Gempuru likun ‘Sarexit’ deka diatur 4 Nov
KUCHING: Gempuru likun ‘Sarexit’ deka diatur kena 4 November 2018 di Padang Merdeka berengkah jam 4 nyentuk ngagai 6 lemai.
Nitihka penerang jurujaku Sarawak For Sarawakians ( S4S), Kc Tan, gempuru diatur enggau tuju minta referendum mai Sarawak ningkilka diri ari Federasyen Malaysia.
“Aku enda nemu penyampau orang ti deka datai ngulu gempuru likun Sarexit.
“Ke pemadu berat iya nya kitai ulih ngenataika pinta enggau peneka kitai,”ku iya ba aum pengarang berita di Kuching kemari.
Kaling Tan ba S4S iya nya Erick Chin ke bela ngulu aum pengarang berita nya madah gempuru nya ila deka dipandang ngagai komuniti di serata dunya nengah media rama.
“Kitai udah minta referendum tu kenyau ari taun 2010, S4S bediri teguh lalu deka majak minta,” ku iya.
Chin madah lebih 30 iku kaban S4S ari Miri deka datai ke Kuching ngulu gempuru nya.
Iya ngarap dalam timpuh kurang ari 2 taun, peranak Sarawak deka meretika reti Sarexit.
“Aku ngarap Perintah Negeri enda sengapa ba pekara tu lalu ngajar kitai bagi ke patut digaga. Kitai semina meratka pemaik peranak Sarawak,” ku iya.
Iya madah Sarawak diatu udah sedia ningkilka diri ari Federasyen Malaysia.
Ngenang sentang perintah baru Pakatan Harapan (PH), Chin madah nadai bida enggau perintah ke dulu, Barisan Nasional (BN).
“Pandangka enti amat bisi bida, beri kami referendum. Beri kuasa ngagai rayat milih,” ku iya.
Dulu agi ari nya, gempuru diperambu diatur kena 5 November 2018 di Waterfront Kuching tang diubah ketegal maya nya bisi Aum Dewan Undangan Negeri. KUCHING: Sarawak deka chakah ngelakuka dagang temuai ke menua luar baka China, dikena nambahka pemayuh temuai datai kitu sereta ulih nyungkakka industri enggau ekonomi nengeri.
Ketua Peolong Setiausaha, Opis Menteri Dagang Temuai, Seni, Main Asal, Nembiak enggau lumba enggau Main, Jee Chin Fu madahka opis menteri nya deka chakah baka bejalaika roadshow kelimpah ari ngarapka mayuh agi penerebai terus ari sesebuah menua ke nengeri tu.
“Dikena ngelakuka dagang temuai, sehari tu opis dagang temuai ari Hainan bisi datai kitu ngaga roadshow ngelakuka endur sida laban deka mai temuai kitai ke menua sida.
“Lalu opis menteri kitai mega beperambu deka mai beperambu deka mai pengemeran dagang temuai kitai ke Haikau (di Hainan) lalu ngatur roadshow ti sebaka dikena ngelakuka menua kitai Sarawak,” ku iya.
Jee dikerandau raban pengarang berita lebuh ke ngulu Program Promosi Pelancongan Hainan ba sebuah hotel ditu, kemari.
Berebak enggau tu lebuh ditanya sekalika opis menteri bisi juluk pemayuh temuai ari menua Hainan, China ke Sarawak, Jee opitimis tauka arap bendar pemayuh temuai lebih agi ari China deka majak nambahka.
Kebuah pia ku iya laban penerebai terus ari menua nya ke Sarawak deka bisi nambah.
“Bepelasarka penerebai terus ari Shenzhen kitu ti berengkah bulan Disember taun nyin kemari nyentuk bulan Jun taun tu, pemayuh temuai ari China aja bisi nambah 20 peratus.
“Nya alai kitai amat optimis lebuh datai ba ujung taun tu kitai ulih nerima 50,000 iku temuai ari menua China.
“Enti penerebai terus bisi ditambah, udah tentu pemayuh temuai ari menua nya ke datai kitu deka nambah,” ku iya.
Ba pengerami sebengkah pengawa nyain sempekat ngatur penerebai terus baru deka dipejalaika ila, inisiatif piak peribit.