Baru patron Pengerami Makai Lemai Krismas 2018

KUCHING: Menteri Kereja Raya, Baru Bian diangkat nyadi patron Pengerami Makai Lemai Krismas 2018 ti deka diatur kena 15 Disember bepalan ba Penview Convention Centre, Demak ditu.

Pengerami diatur begulai tiga gempung ukai dikuasa perintah (NGO) Dayak ti nyadi pengatur dua renggat Forum Adat Iban, iya nya Serakup Dayak Sarawak (PEDAS), Serakup Dayak Iban Sarawak (SADIA) Krian enggau Raban Pemikir Dayak (DTTG) Kuching.

Kenu ku Chairman Pengatur Begulai, Victor Ason, batang tuju pengerami tu dikena ngempung raban bansa Dayak ti pulaika pemaik enggau peneguh tanggam kaul antara sida.

“Kitai neladan pemanah tanggam kaul bala menyadi kitai bansa Dayak ba Kalimantan. Chukup siru enggau basa ti ngasuh sida gauk ngaul pangan diri. Kering negika peminta asil ari sukung tegut semua.

“Kitai mega deka ngempuruka semua bansa nadai ngira penatai asal, pengarap tauka bida penemu politik berami begulai ngintu penatai hari kudus bala menyadi kitai ti megai pengarap Kristian,” ku Victor nerang.

Naka diatu ku Victor, kelimpah ari Kaban Kunsil Nengeri (ADUN) Ba’Kelalan enggau Kaban Parlimen (MP) Selangau, Baru Bian, bela udah ngenukuka diri datai ngulu pengerami ila iya nya ADUN Krian enggau MP Saratok, Ali Biju kelimpah ari bala pemesai Dayak ari Kalimantan, Indonesia.

“Nibak jaku injil ari Bup Kudus, Garam enggau Terang Dunya (Matius 5: 13-16) nyadika tiang penegap ba pengarap sereta lalau ba pengidup ti patut dikemeran genap iku kitai.

“Bala komiti pengatur mega sepenemu milih pengawa ‘nambun bungai’ dikena ngerichahka agi pengerami,” ku Victor.

Nangkan nya, gaya gari dipilih ungkup malam berami iya nya Wild West tauka baka gari bala cowboy. Bemacham atur pengerami udah dirintai baka main asal kuntau enggau sape, chabut tikit benasit, lagu karaoke, suara emas enggau ke bukai.

Berindik ari nya, mensia mayuh bela ditesau sampal datai ngulu pengerami sereta berami ngintu Hari Krismas seraya neguhka tanggam kaul enggau pangan diri.

Penerang silik pasal tikit mija tauka pekara bukai tau betanya nuju Polycarp Danson (010-9601120), Jill Braoh (014-5791856) enggau Eric Nanang (012-8798212).