Sarawak dikearap ulih ngambi baru hak, kuasa ti udah lenyau
KUALA LUMPUR: Sarawak dikearap ulih ngambi baru semua hak enggau kuasa ti udah lenyau dalam Konstitusyen Malaysia enggau Sempekat Malaysia 1963 (MA63), nyema semua rayat lebuh agi rebak baru menua Kenyalang bejalai ngena siti penemu sereta bekerejasama rat enggau perintah nengeri dalam negika aset nya.
Nitihku anak tuai niang Tun Jugah ti sama enggau nyain sempekat numbuhka Malaysia, Tan Sri Leonard Linggi, iya arap Putrajaya di baruh iring perintah Pakatan Harapan (PH) enda deka terus ngerusak nama ti udah ditulis dalam undangundang nya, taja pan udah lenyau kenyau 55 taun ke udah.
“Nama ke dikearapka aku iya nya rebak baru kitai deka terus negika hak enggau kuasa ke pemaik Sarawak ti ditulis dalam Konstitusyen Malaysia enggau MA63.
“Patut dikeingatka, Sarawak iya nya sebuah wilayah ti numbuhka Malaysia tang deka ngulih tauka ngambi baru aset ti lenyau, kitai patut terus ngena pengawa berandau tauka berunding lalu ukai nya belaya.
“Nengah pengawa berandau tauka berunding ti manah, enda patut sida perintah besai meri nama ke endang dikeempu rayat Sarawak,” ku iya ke nyadi kaban panel Forum ‘Federalisme: Perlembagaan Malaysia dan Perjanjian Malaysia 1963 nyerumba Laban Berambeh Anak Sarawak 2018 ba Pusat Pameran dan Perdagangan Antarabangsa Malaysia ( MITEC) ditu, kemari.
Berebak enggau tu, Linggi mega ngingatka perintah Sarawak ngambika ngagihka enggau sebela nyema mujur ngambu pulai baru semua hak enggau kuasa nya.
“Lebuh bulih baru aset tu, tentuka iya dikunsi enggau semua rayat Sarawak enda ngira bansa tauka jalai pengarap...anang semina meri ngagai sekeda orang aja baka ke nyadi sebedau tu.
“Enti tu enda diagihka sebela, Putrajaya deka ketawaka kitai,” ku iya seraya nerima tempik jari ari beribu iku anak Sarawak ke bisi datai nyengkaum ke belajar, gawa enggau diau di Semenanjung Malaysia.
Siku agi kaban panel, Dato Sri Nancy Shukri ti kala nyadi Menteri ba Opis Menteri Besai ti megai tanggungpengawa berunding ngambi pulai baru hak enggau kuasa Sarawak di baruh Perlembagaan Persekutuan enggau MA63 maya perintah diketuai Barisan Nasional (BN) sebedau tu, madahka pengawa nya enda ngetu taja pan perintah besai udah betukar.
Iya ke nyadi Kaban parlimen Batang Sadong bebendar madahka semua Kaban Parlimen ari Gabungan Parti Sarawak (GPS) maya dalam aum Parlimen mega enda kala ngetu nagih hak ti dipunka niang Pehin Sri Adenan Satem maya ke nyadi Kepala Menteri.
“Kami enda diau diri... kami deka terus nentuka hak enggau kuasa Sarawak ti lenyau diberi pulai baru lalu nya alai, kami deka semua rayat Sarawak terus nyukung sereta bediri dibelakang kami dalam negika pekara tu,” ku iya.
Nancy bejaku baru madahka semua Kaban Parlimen GPS mega udah betemu enggau Menteri Besai, Tun Dr Mahatjir Mohamad lalu nerangka ngagai iya pasal pekara nya.
“Enti meda rikod Kaban parlimen Sarawak ngelama tu, kami ukai deka belaya. Kami enda madah kami ti pemadu manah tang kami semina negika hak raban bansa enggau Sarawak.
“Kami bepolitik ungkup rayat Sarawak ngambika perintah besai ngaku Sarawak nyadi kaling seati dalam penumbuh Malaysia, ukai nya sebuah nengeri,” ku iya.
Kelimpah ari nya, Menteri Muda Undang- Undang, Kaul Nengeri-Perintah Besai enggau Pematau Projek, Sharifah Hasidah Sayeed Aman Ghazali madahka perintah nengeri mega enda enda nurutka perintah besai, nyengkaum ari segi meri kuasa ngagai Sarawak.
Nya alai, iya ti mega siku ari kaban panel madahka perintah nengeri dalam pengawa berunding renggat kedua dalam pengawa nagih undang- undang konsti- tusyen enggau wang.
“Kitai deka ke Sarawak ditegap laban tu hak kitai lebuh numbuhka Malaysia. Tu laban kitai nyain MA63 nyadi kaling seati, ukai nyereta Malaysia sereta enggau nya, kitai bisi hak.
“Nyadi, tu ke deka kami ambi pulai baru iya nya kuasa ngatur pengawa ti mayuh lenyau pengudah 55 taun penumbuh Malaysia,” ku iya.
Sama bisi datai, penyelaras Lan Berambeh Anak Sarawak 2018, Datuk Seri Fadillah Yusof, chairman Datuk Seri Wan Junaidi Tunaku Jaafar, Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah, Menteri Kaunsil Kandang Menua enggau Pengawa Berumah, Datuk Dr Sim Kui Hian, kaban kabinet nengeri sereta pengari rayat GPS.