Tu beguna ngambika tanah ulih dikemansang ungkup betanam betupi dandang besai sereta nguntungka pengempu tanah
KUCHING: Kaban Kunsil Nengeri (ADUN) Mambong Datuk Dr Jerip Susil madahka pengawa ngaga jalai kebun deka nyadi antara pengawa dikemeratka iya kandang beberapa taun deka datai.
Iya nyemetak madahka pengawa nyendiaka perengka guna baka nya deka ngasuh mayuh agi tanah ba kandang menua nya dikemansang ungkup pengawa betanam betupi dandang besai sereta nguntungka pengempu tanah.
“Kitai mayuh tanah ti diteju pia aja, kandang beberapa taun deka datai, antara fokus aku deka ngaga jalai kebun ba kandang menua tu dikena nyungkak aktiviti betanam betupi dandang besai sereta mantu pengempu tanah,” ku Dr Jerip, ti mega Menteri Muda Perengka Pengangkut madah kemari.
Iya mansutka jaku tu lebuh bejadika pengawa muka Jematan Pangga ba Kpg Emperoh Jambu di Padawan, semak ditu.
Ku iya, projek jalai kebun beungkus RM300,000 ba Kpg Emperoh Jambu, ti deka berengkah digaga enda lama agi, enggau projek betanam betupi RM500,000 berengkah dipejalai taun baru, mega ba genturung pendiau nya.
Dr Jerip nyemetak madahka pengawa ngelakuka betanam betupi dagang besai nyadi renggat kedua ari agen- da pemansang, bisi nyendiaka penyikap perengka guna pemun enggau infrastruktur ngagai nyauka semua genturung pendiau ba sitak nya.
Iya keran meransang peranak kandang menua nya ti bisi dadang tanah ngambika nanam kupi ungkup dagang besai, ti bisi rega ti manah.
Nitih ku iya, rega sekilo Arabica coffee urung RM25, seraya nambahka, kupi import nengeri urung berega RM50 juta setaun ari Indonesia.
Ba lansa bukai, Dr Jerip ngansak raban ejensi bejalaika projek ungkup sitak tu ngaul opis iya enggau pelilih mit Padawan.
Pekara tu ku iya patut dikena nentuka pejalai projek nya ulih ditemu enggau silik ba spesifikasyen kereja sereta bekenaka kereban berumah ti betul.
Dr Jerip mega tepantup ati enggau kerejasama ari peranak menua nya enggau raban kunteriktor ti bejalaika mayuh bengkah projek.
“Enda baka ba sekeda endur, ke alai raban kunteriktor napi penanggul enggau pemar laban kereban injin sida dirusak lalu ba sekeda kes peranak minta wang perlindungan, ba sitak Mambong ditu, kes baka nya nadal nyadi,” ku Dr Jerip.
Iya ngarapka penusah baka nya enda deka nyadi ba sitak nya laban tu nadai ngemai pemaik ngagai rayat.
Ngelansa pasal projek jematan, iya madahka udah berengkah digaga kena 8 November taun nyin tadi lalu tembu kena 14 Ogos taun tu, ungkus RM361,574 lalu tu sebagi ari Program Transformasyen Menua Pesisir (RTP).
Sama bisi datai Pemesai Pengatur Pengawa Sarawak ari Opis Pelilih Mit Padawan Rangen Jamang, Temenggong Austin Dimin, Penghulu Richard Daho enggau Penghulu Tora Tongsen.
Kitai mayuh tanah ti diteju pia aja, kandang beberapa taun deka datai, antara fokus aku deka ngaga jalai kebun ba kandang menua tu dikena nyungkak aktiviti betanam betupi dandang besai sereta mantu pengempu tanah. Datuk Dr Jerip Susil Menteri Muda Perengka Pengangkut