Anang ngarapka gaji maya nyereta gerempung
MIRI: Ulah sekeda raban ti beambi ulih nyereta serakup dikena ngulihka ungkup enggau nama ukai semina enda lurus tang mega ngamahka nama serakup nya.
Kaban Kunsil Nengeri (ADUN) Telang Usan, Dennis Ngau madah, nya kebuah serakup patut milih enggau nyiri bala kaban ti endang deka gawa sereta ulih ngereja pengawa enggau lurus ungkup sida.
Ku iya, tetiap serakup ulih nyapai juluk pengawa numbuhka iya enti sema bala kaban lurus ati enggau sanggup ngena penau sereta gerah jari ba belanja dikena gawaka bala komuniti.
“Anang ngandalka gelar bintang ari Tuai Pemegai Menua (TYT) enggau gaji laban pekara tu endang nadai. Enti bisi niat baka nya, manah agi anang nyereta sebarang serakup. Aku enggai, enti sema nadai nerima gelar tauka gaji, raban nya deka ngereja pengawa ti tau ngerusak aktiviti enggau ngamahka nama serakup.
“Pekara baka tu udah kala nyadi ba serakup, nya alai aku nyadi kaban kunsil Gerempung Serakup Orang Ulu Malaysia (FORUM) enggau Presiden Serakup Kayan Sarawak ( PKS) enggaika pekara tu ditandu,” ku iya.
Dennis mansutka jaku nya ba pengerami makai lemai pengawa ngelancharka Pampang Leto (Indu) Kenyah Baram diatur Serakup Bansa Kenyah Sarawak (PPKS) di sebuah hotel ditu, malam kemari.
Ku iya nambah, pengawa ditegika ba serakup nadai dibayar lalu nadai bulih penguntung, nya alai iya ngarap barang sapa ti dipadu nyadi komiti Leto Kenyah Baram ila sedia gawa meruan.
“Aku ngarapka bala kaban ti dichiri ulih bejalaika tanggungpengawa enggau pangku pengawa dilempai setipak enggau konteks idup ba mengeri di Miri ti seruran maju enggau komuniti majak mayuh.”
Dulu ari nya, Dennis temegah ati enggau PPKS ti nyadi siti ari semilan serakup di baruh pegai FORUM laban mujur numbuhka pampang indu keterubah.
“Tu siti agi pengawa dijapai ba turai FORUM kelebih agi PPKS laban mujur numbuhka pampang indu. Enti nitih selama tu, semina bisi sayap indu aja. Tu siti agi pengawa mansang ke mua PPKS ngerembaika pangku pengawa sida kelebih agi ba pemansang raban indu.”
Iya ngarika Presiden PPKS ti nyadi ADUN Murum Kennedy Chukpai nambah, pengawa numbuhka Leto Baram Kenyah nyadi teladan manah ngagai serakup bukai di baruh pegai FORUM.
“Aku andal pampang khas indu tu deka ngenegapka agi penyerakup bansa Kenyah kelimpah ngemai raban indu ngagai tikas tinggi agi,” ku Dennis seraya ngarapka pampang nya ulih bekerejasama enggau serakup FORUM bukai pulaika pemaik komuniti Orang Ulu.
Berebak enggau pengerami nya, Dennis ngemendarka agih belanja di baruh Pro- jek Mit Pemansang Menua Pesisir (MRP) sepenyampau RM10,000 enggau RM5,000 ngagai PPKS enggau Pampang Leto Kenyah Baram.
Dulu ari nya, chairman pengatur ti mega nyadi chairman protem Pampang Leto Kenyah Baram, Esther Joseph Usat madah, pengawa numbuhka pampang nya deka nyadi pelasar ngempung komuniti Kenyah ba semua renggat.
Pengerami lemai nya diricha enggau koir ari bala kaban PPKS, Cwangan Leto Kenyah Baram, nyanyi enggau tanda asal.
Sama bisi datai Sapit Presiden PPKS Dominic Lusat Sagan, Ketuai Pampang PPKS Kuching Lucas Kalang Laeng, Presiden Serakup Berawan Sarawak Datin Catherine Awing sereta bala ketuai raban bansa bukai.