Penanggul Sungai Selepong enggau jalai genturung Datai Kenyalang patut diputar
KAPIT: Peranak genturung pendiau Datai Kenyalang, KM3 Jalai Selirik ditu ngapil raban Bagi Pekara Pengerai Mensia Mayuh enggau Rampa Menua, Kaunsil Pelilih Kapit enggau Opis Kereja Raja bejalai ngabas Sungai Selepong iya nya ai sungai ti anyut ngagai Sungai Aman.
Sida mega minta piak bekaul nyeleti sebagi ari simpang jalai ti belingkuk, enda sebela peninggi, lalu bisi beratus rumah ba Selepong Kenyalang.
Bejalaika pengawa belalauka peminta peranak Datai Kenyalang, Temenggong Wilfred Billy Panyau ngapil ngagai raban bejalaika program menua pesisir Kaunsil Pelilih Kapit ngatur pengawa beripai ngupas enggau meresi Sungai Selepong ti tepekul ketegal mayuh uras enggau apat ngalitka sungai.
Tetiap kali ujan, ai deka ngampuhka kandang menua baruh lalu deka ngandang ai endur nyamuk betelu laban ai leledong dia aja.
Peranak dia irauka sida kena sakit nyamuk baka malaria tauka denggi ari pemayuh nyamuk ke bisi dia. Sida ngarapka raban kaunsil enggau opis pengerai ngatur pengawa beripai nyaup peranak ngupas Sungai Selepong, ngambi ngemunaska endur nyamuk betelu sereta mutarka penusah bah tunggal ba kandang menua baruh.
Sida mega minta Opis Kereja Raya (JKR) bejalaika pengawa nyeleti jalai belenggok ba sebagi ari simpang Jalai Datai kenyalang. Nitih ku ex-kaunsilor Kaunsil Pelilih Kapit, John Jaloh, ujung bulan Ogos nyin tadi, sebagi ari jalai dibelakin baru di baruh Kaunsil Pelilih Kapit.
Tang sinu amat ku iya, raban kunteriktor enggai kiruh mantu nyungkur simpang jalai ti diatu nyadi jalai besai ti baruh agi, seraya ba pemansut jalai ba tanah ti tinggi agi ba seberai parit. Tu ngasuh sida ti betengahka jalai napi pemar kelebih agi sida ti ngena motosikal maya malam hari.