PKKS mujur numbuh pampang indu dibaruh pegai FORUM
MIRI: Serakup Bansa Kenyah Sarawak (PKKS) mujur numbuhka pampang indu sida, nyadi keterubah antara kesemua semilan serakup Orang Ulu di baruh Gerempung Serakup Orang Ulu Sarawak Malaysia (FORUM), ditu kena Hari Lima tu tadi.
“PPKS nyapai siti agi turai kenang serakup Orang Ulu di baruh pegai FORUM ari pengawa numbuhka pampang indu tauka Pampang Leto Kenyah Baram (LKB), enti baka selama kitai semina bisi sayap indu aja.
“Aku deka meri tabi puji ngagai PPKS ba pemujur besai tu kelebih agi ngagai komuniti Kenyah, ke alai kitai setuju numbuhka pampang tu di baruh payung PPKS,” ku Mandal Presiden FORUM enggau Kaban Kunsil Nengeri ( ADUN) Telang Usan, Dennis Ngau, lebuh iya bejaku bejadika Pampang LKB ba Hotel Imperial ditu.
Dennis ti ngarika Presiden PPKS, Kennedy Chukpai Ugon, madahka pengawa numbuhka pampang indu PPKS nyadi teladan ti manah ngagai serakup bukai di baruh pegai FORUM.
“Aku andal amat ari pemisi pampang khas indu tu, kitai ulih nampung pengawa ngeneguhka serakup bansa Kenyah ba Malaysia, kelebih agi ba Sarawak.
“Sebarang komuniti ti bisi ati beserakup enggau nyadi sebagi ari serakup, sida tentu deka teulihka pemujur taja pemujur nya enda datai tekala nya,” ku Dennis ti mega Presiden Serakup Kayan Sarawak.
Iya mega ngansak bala kaban Pampang LKB gawaka bala komuniti enggau pengelurus sereta niat ti betul.
“Ngaul diri ba serakup mesti nyadi volunteer. Anang bisi ati ngandal ari pengiruh kita gawa deka bulih gelar ari TYT tauka dibalas mata duit, nadai pekara baka nya nyadi.
“Enti bala kita bisi niat baka nya, manah agi kita anang nyadi sebagi ari serakup laban kita deka asa lalu enti kita asa, kita deka ngereja pengawa ti enda manah, tau ngamahka nama serakup enggau bala komuniti,” ku iya ngelalau.
Berebak enggau pengerami nya, Dennis ngemendarka belanja penyampau RM10,000 enggau RM5,000 ngagai PPKS enggau Pampang LKB ari Projek Mit Pemansang Menua Pesisir (MRP) ungkup aktiviti sida.
Chairperson pengatur, Esther Joseph Usat madahka tuju pengawa numbuhka pampang nya ungkup bala kaban ari komuniti Kenyah meri tabi puji ngagai berekat ti diasaika sida sereta nempa rebak dudi hari menyana agi.
“Penyerakup beguna amat ngagai semua nadai ngira penempa diri, umur enggau tikas. Nya kebuah, penyerakup enggau pengawa ti meruan ulih ngemai siti tauka gerempung nyapai pemujur ba mayuh bengkah pengawa.
“Aku pechaya ari pengawa numbuhka Pampang LKB tu deka meransang semengat raban indu nyingkang mansang ke mua nyapai pemujur ba sebarang pengawa deka dikaul sida,” ku Esther, ti mega chairman protem Pampang LKB.
Antara aktiviti bisi diatur ba pengerami ti berambaika jaku ‘ Alem Pemung Pebulung’ (Begempung Nyadi Siti) iya nya koir ari PPKS enggau Pampang LKB, nyanyi enggau tanda asal sereta chabut tikit benasit.
Sapit Presiden PPKS Dominic Lusat Sagan, Ketuai PPKS Pampang Kuching Lucas Kalang Laeng, Presiden Serakup Berawan Sarawak Datin Catherine Awing, Sekreta9ri Politik Kepala Menteri Datuk Robert Laing Anyi enggau Ketuai Komuniti Long San Lucia Paya antara bala bisi datai ngulu pengerami nya.