Galeri Ranee Margaret Sarawak produk baru industri dagang temuai
GALERI RANEE MARGARET SARAWAK siti agi produk baru industri dagang temuai Sarawak lebih agi di mengeri Kuching, ti dikearap ngenyakah sereta tau nyungkak industri nya di nengeri tu.
Kompleks Mahkamah Lama di Kuching ti digaga ba taun 1883 ulih Sir Charles Brooke, Rajah Sarawak ti kedua, dipilih nyadi palan endur numbuh sereta muka Galeri Ranee Margaret Sarawak.
Galeri nya ti ditaja Yayasan Brooke sereta Muzium Brooke ti diketuaika Direktor iya Jason Desmond Anthony Brooke iya nya uchu Rajah Muda kepenudi Sarawak.
Palan tauka geleri ti dibuka semak enggau rumah kedai lama ke agi ngetanka seni lama ba sepemanjai Lebuh Gambir, Lebuh India, Lebuh Carpenter enggau Bazaar Utama, dikearapka bendar ulih matak temuai ari dalam enggau luar nengeri tu ti deka nemu pasal sejarah Ranee Margaret Sarawak.
Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah maya bejadika galeri nya madahka penemuai ke Kuching enda serap sereta rugi nyema enda ngetu ba galeri nya ti nyeritaka mayuh pasal Ranne Margaret sarawak.
Kebuah pia ku iya laban mayuh sejarah pasal Ranee Margaret Sarawak ti enda ditemu laban ke enda semua ditulis dalam bup sejarah.
“Taja pan cherita pasal indu tu enda mayuh dalam bup sejarah tang enti dipeda ari chara tauka penemu bukai, iya bejalaika pengawa besai dalam tiap pemutus ke digaga maya dipegai tauka diperintah Rajah Brooke.
“Enti nadai iya ( Ranee Margaret) endur sejarah baka Astana enggau kubu Margherita ke diberi ngelai nama iya udah tentu nadai dipeda kitai sehari tu,” ku Abdul Karim maya bejadika galeri nya kena 29 September 2018.
Pemandang ba galeri nya ngayanka pasal pengidup, legenda enggau legasi Margaret de Windt ti beumur 19 taun, belaki ke Rajah kedua Sarawak sereta ngasaika pengidup baru nyadi bini rajah sebuah perintah ti nyelai, siti pengawa ti udah dipejalaika iya nyau deka setengah abad.
Berani, bepenemu enggau penuh enggau pengeregas, iya ngena penuduk iya ti nyelai mechahka penti pemali. Nyadi siku orang ti ngemeratka pelajar raban indu ba menua diri empu sereta nyadi duta maya ba menua tasik, iya dikelala nyadi payung rayat ti deka dipeda iya nyadi rayat iya empu.
Sarawak meri peransang kreatif ngagai iya ke alai udah ditunjukka iya nengah asil ngelukis, muzik, sastera enggau kraf. Ketegal pengibuh sereta terima kasih iya ngagai pengelandik menua tu empu baka tenun songket enggau sulam keringkam, asil kereja ti pemadu manah asil ari barang ke digumpul iya, diatu ulih dipekunsi.
Objek ti ngayanka asil ke chukup alus ulih meri peransang ngagai rebak baru neruska pengawa asal nya.
Ba galeri nya kitai ulih nemu tauka nyidi pejalai Margaret lebuh iya ngiga reti, tuju enggau identiti ba Sarawak, pengudah enda diterima ba endur bukai.
Nambahka nya ba geleri tu mega ngayanka barang ke digumpul sereta ngembuan rega sejarah ti tinggi ti dikeempu Ranee Margaret baka kebarung panjai naka patung urung taun 1180, iya nya gari ke keterubah Ranee ke chukup tebilang, kelimpah ari nyerita sejarah pengidup ari mit nyentuk ngagai udah belaki sereta nyadi Ranee tauka permaisuri.
Kebarung panjai naka patung Ranee Margaret nya digaga ari sutera Cina kaya (shantung) ti bechura ungu, iya nya chura asal raban diraja Eropah. Plat emas iya nya ciri Melayu asal sereta mahkota ungkup peturun diraja.
Ranee Margarat’s Keringkam, urung 1880 mega bisi diapndangka ba galeri nya. Keringkam Sarawak iya nya tudung (skaf) pala asal ti dikena orang indu Melayu maya bisi pengerami khas baka kawin.
Tudung keringkam nya chukup dikesayau laban sulam iya diasilka ngena ubung emas tauka perak sereta dianggap nyadi reta pesaka ruang bilik ti dipeturunka ngagai siti-siti serak.
Keringkam ti disulam ungkup Ranee nya, kitai ulih meda kaul rat Ranee enggau raban bansa menua tu maya nya suba. Di asilka ari kain kuning ti berega (kuning iya nya chura diraja Melayu) ti dilangkar ngena motif ti tusah disulam ngelinggi nya, lalu nya asil ke chukup nyelai ari pengelandik jeman suba lalu nya entara pemadu lama ke ditemu naka ke diatu.
Kain Songket Limar Sarawak Ranee Margaret, urung 1880 mega bisi diayanka ba galeri nya. Kain songket limar nya ungkup Ranee ti diasil tauka digaga bala bakih melayu iya ti nyadi chunto pemadu manah asil tenun asal melayu ke alai suah dikaitka enggau diraja sereta dikena maya pengerami adat.
Ba kain Songket Limar nya, kitai ulih meda motif enggau corak ti nunjukka flora enggau fauna, barang ias enggau mahkota, semua nya ngayanka pengaya, kuasa enggau status.
Agi mayuh sejarah bekaul enggau pejalai pengidup Ranee Margaret ke bisi dipandangka ba galeri nya baka pemerani enggau pemintar iya, pemutus iya maya agi indu biak ti berani ninggalka pengidup asal lalu nerima pengidup baru sereta ke bukai, ke nadai ditulis dalam bup sejarah ke patut ditemu mensia mayuh.
Gambar lama Ranee Margaret mega mayuh dipandangka ba galeri nya ke nadai dipandangka ba bup sejarah.
Galeri tu tebuka ngagai mensia mayuh tiap hari nyengkaum hari besai (kemisi) berengkah pukul 9 pagi ngagai 4.45 lemai.