100 iku penyereta di Limbang diajar ngasilka rian bekualiti

LIMBANG: Perintah Nengeri deka ngintu baru 5,000 pun rian chukup tuai ba Limbang di baruh program pemungkal dikena ngasilka rian ti manah, galak enggau isi ti kualiti.

Menteri Muda Betanam Betupi, Dr Abdul Rahman Ismail madahka tu sebagi ari pengawa dipejalaika perintah nengeri bekerejasama enggau Top Fruits (Sarawak) Sdn Bhd, ngintu 500,000 pun rian ba nengeri tu lalu nanam baru dikena ngidupka baru pemansut asil rian.

Sebedau tu, tebal agi sida ti ngempu rian ngena chara lama nanam, neju enggau chara mulung ti ngujungka asil kurang.

“Pengawa ngintu baru kebun rian iya nya siti ari chara chukup manah dipejalaika perintah dikena ngeluarka buah rian ti meruan dikena nangkup peminta menua tu enggau luar,” ku iya ba atur Kus Ngintu Baru Kebun Rian di Balai Kampung Bunga Raya Hall kemari.

Sama bisi datai Sapit Direktor Opis Betanam Betupi Nengeri Rosahajah Mohidi, Pemesai Opis Betanam Betupi Bagi Menua Jafaruddin Ali, Benson Kho, pengari ari Top Fruits Company (Sarawak) Sdn. Bhd., enggau Tan Kang Wei ari Bayer Company.

Sepenyampau 100 iku penyereta kus datai ari peranak menua nya.

Dr Rahman, ti mega Kaban Kunsil Nengeri ( ADUN) Bukit Kota, madahka Opis Menteri Betanam Betupi udah ngelala 5,000 ari 45,000 pun rian di Pelilih Limbang ngambika dijaga dikena nangkup peminta ba makit.

“Dikena nambahka Limbang, tiga agi kandang menua dikelala ungkup bejalaika projek tu ngaul Serian, Betong enggau Long Lama,” ku iya.

Perintah nengeri udah nyain Sempekat Pemereti Ati (MoU) enggau Top Fruits Company (Sarawak) Sdn. Bhd ba pengawa ngemansangka industri rian lalu udah nyain sempekat dua taun nyirika iya ngambi ngemansangka bansa rian Musang King ba nengeri tu.

“Belalauka peneleba 35 taun pengelama Top Fruits Company ( Sarawak) Sdn Bhd dalam industri rian, kitai minta sida nyaup ba pekara latih enggau nyendiaka pakar rian,” ku iya.

Menteri muda nya madahka tuju iya deka ngemai bala pekebun rian menua tu mansutka asil rian bisi kualiti tinggi ti mayuh ba nengeri tu ungkup guna menua tu enggau eksport. KUCHING: Kaunsil Pengatur Sekula Sekondari ( SMK) St Teresa ditu, minta bantu tambah ari Opis Menteri Pelajar nengah geran dikena nampung ungkus dikena ngaga baru sekula nya ke udah rusak ketegal penusah angus, dua taun ke udah.

Chairman iya, Thomas Hua Kok Sen madah SMK St Teresa digaga ba taun 1885 lalu nyadi sebengkah ari sekula pemadu tuai ba menua tu.

Iya madah, dikena ngaga baru blok pengereja pengawa, bilik kelas enggau balai raya, SMK St Teresa begunaka belanja manggai RM8.2 juta.

“Naka tu, penyampau belanja ke digumpul manggai RM3.2 juta, nya pan bedau chukup dikena nangkup ungkup ngaga ungkup renggat keterubah ngaga blok pengereja pengawa enggau bilik kelas ke beungkus RM3.8 juta...kami agi enda chukup RM600,000.

“Projek ngaga fasa keterubah deka berengkah ujun taun tu lalu dipelaba tembu Disember 2020. Kami nyau ngaga baru sekula tu berenggat laban enda chukup belanja,” ku iya rambau aum media beserimbai enggau Pengerami Makai Lemai Ngumpul Belanja ‘ Let’s Rebuild St Teresa’ ditu, ensana.

Thomas madah, mensia mayuh ex- nembiak sereta piak swasta ke gerah jari diperansang dtai meri bantu ngagai turu ngaga sekula nya.

“Endang nyadi pengandal aku deka meda dudi hari ila SMK St Teresa nyadi sekula siti sesi seriris enggau Pelin Besai Pelajar ke meransang sukung piak swasra nengah aktiviti tanggungpengawa rama korporat,” ku iya.

Kena 16 Nov tu, Kepala Menteri Sarawak Datuk Patinggi Abang Johari Tun Openg dipelaba datai ngulu pengerami makai lemai nya.

Penerang silik pasal rega tiket mija tau betelefon nuju Kiew Lee Chin ba lumur 019- 8941923 tauka Tan Pek Huang (016-8898113). — Bernama