DAP Sarawak sedia mantu ngena undang-undang Surat tesau nya diasai baka ngemelika ketuai raban bansa, nadai nitihka konstitusyen sereta enda diterima akal
KUCHING: Parti Tindakan Bersatu ( DAP) Sarawak sedia meri servis ba pekara undang-undang mantu bala ketuai raban bansa ngelaban surat tesau ke dikeluar Opis Sekretari Perintah Negeri.
Nengah surat tesau ke dianjung nuju opis residen di serata negeri kena 11 Oktober 2018, raban ketuai pupu bansa ditagang datai ngulu pengerami ke ukai diatur Perintah Negeri.
Chairman DAP Sarawak Chong Chieng Jen ngasai surat tesau nya baka ke ngemelika raban ketuai pupu bansa lalu enda nitihka konstitusyen sereta enda diterima akal.
“Nyema bisi ketuai pupu bansa sanggup ngeripot sentang surat tesau tu, DAP deka meri bantu ba pekara undang-undang.
“Kitai deka nyendia servis luyar enggau enda bebayar,’ku iya ba aum pengarang berita di Indu Opis DAP ditu, kemari.
Chong ke mega Sapit Menteri Dagang Dalam Menua enggau Pekara Bebeli Barang minta Perintah Negeri meri basa ngagai raban ketuai pupu bansa.
Iya mega minta Perintah Negeri enda nginsil hak sida arika ngulu sebarang bengkah pengerami baikka nya diatur Perintah Besai tauka Negeri.
Ku iya, ketuai pupu bansa nyadi jematan ke nyambung rayat enggau perintah sereta ijinsi perintah.
Iya pechaya surat tesau ke disain Sekretari Perintah Negeri Tan Sri Mohamad Morshidi Abdul Ghani nya mandangka Gabungan Parti Sarawak ( GPS) nangi diri alah ba pengawa bepilih ti deka datai.
Beambika chunto 2 bengkah program ( Chong) ke nyadi di Bintulu dalam timpuh dua bulan ke udah, iya madah opis residen bisi nagang pengulu datai ngulu pengerami nya.
“Tajapia ba kededua program nya, bala tuai rumah bisi datai.
“Kelimpah ari nya, sida mega bisi ngasuh kitai nginsil program nya,” ku Chong.
Nyema bisi ketuai pupu bansa sanggup ngeripot sentang surat tesau tu, DAP deka meri bantu ba pekara undangundang. Chong Chieng Jen Chairman DAP Sarawak