Perintah Besai dulu nagang opis tauka ejensi ngundang pengari rayat ari perintah nengeri ngulu program sida, ku Dr Penguang
KUCHING: Pemutus nagang raban ketuai pupu bansa datai ngulu program ke ukai diatur perintah nengeri digaga ketegal ulah Perintah Besai.
Menteri Muda Opis Kunsil Kandang Menua, Datu Dr Penguang Manggil madah, pekara nya dipun perintah besai nengah chara nagang opis tauka ejensi ngundang pengari rayat ari perintah nengeri ngulu program sida.
“Enti kita nanya sekalika aku setuju tauka enda atur nagang ketuai pupu bansa ngulu program ke diatur perintah nengeri, ulah tu dulu dipun Perintah Besai.
“Enti kita bisi berati, sekula ditesau enda ngundang pengari rayat ari perintah nengeri ba program sida. Reti nya, sama tau mih perintah nengeri ngaga pekara ke sama.
“Peda Opis Pemadah diatu, sida enggai mantu kami lalu pia mega Bomba, tang aku meri basa ngagai ketuai ejensi ketegal ti ngaga pemutus nya, iya empu.
“Ketegal nya maya aku ngulu program di SMK Marudi, aku nanya sekalika sida udah ngulihka pemendar ari raban ketuai di atas,” ku Penguang.
Iya mansutka jaku nya ba aum pengarang berita ke diatur di Begunan Baitulmakmur ditu, kemari.
Iya ke mega Kaban Kunsil Nengeri Marudi madah, iya udah melanja lebih RM2 juta ungkup sekula dalam kandang endur nya.
Ba taun ke udah iya madahka udah ngaga lima iti stadium mit lalu pia mega udah nyuaka geran projek mit menua pesisir (MRP) dikena mantu rayat.
Ngenang jaku Chairman DAP Sarawak, Chong Chieng Jen ti madah DAP sedia meri servis enda bebayar ba pekara undang-undang ngagai raban ketuai pupu bansa, Penguang madahka diri enda meretika tuju Chong nya.
Ku iya, meseti dikeingatka raban ketuai pupu bansa ti dichiri perintah nengeri nya nyadi penyambung entara perintah enggau rayat.
“Aku mega macha artikel Baru Bian sentang atur nyiri ketuai pupu bansa ti bepelasarka adat ruai.
“Aku enda nemu adat nama nya, tang ketegal ti deka ngenah rayat di rumah panjai enggau lurus, kitai meseti bebaska pemutus sida.
“Ketegal nya maya aku nyadi ADUN Marudi, pekara ke dulu digaga iya nya meri kuasa ngagai rayat tauka peranak rumah panjai nyiri ketuai sida empu,” ku iya.
Enti kita nanya sekalika aku setuju tauka enda atur nagang ketuai pupu bansa ngulu program ke diatur perintah nengeri, ulah tu dulu dipun Perintah Besai. Datu Dr Penguang Manggil Menteri Muda Opis Kunsil Kandang Menua