Undang-Undang Mit Opis Kunsil Kandang Menua 2018 deka diterit berengkah 1 Dis

KUCHING: Sarawak deka neritka Undang-Undang Mit Opis Kunsil Kandang Menua (Lisin enggau Atur Ngintu Ukui), 2018 berengkah 1 Disember 2018.

Atur neritka undang-undang mit ke baru nya dipejalaika ketegal pengelekai sakit rabies tauka ukui gila di nengeri tu kenyau kes keterubah ba taun 2017.

Menteri Muda Opis Kunsil, Datu Dr Penguang Manggil madah undang-undang mit nya mungkur 26 piak Opis Kunsil (PBT) di serata nengeri nyengkaum Dewan Bandaraya Kuching Utara (DBKU), Majlis Bandaraya Kuching Selatan ( MBKS) enggau Lembaga Kemajuan Bintulu (BDA).

“Diatu semua 26 opis kunsil di Sarawak bisi Undang-Undang Mit Lisin Ukui ke digaga entara taun 1961 enggau 1962.

“MBKS enggau DBKU udah mansik baru UndangUndang Mit Lisin Ukui ba taun 1991 enggau 1990.

“Ungkup tuju ngemanah lisin sereta ngintu penyampau ukui, bisi kebuah kitai ngempung 26 undang-undang mit lisin mit ukui ba siti undang-undang ke dikena ba serata nengeri,” ku iya.

Iya mansutka jaku nya ba aum pengarang berita sentang undang-undang mit baru di Begunan Baitulmakmur ditu, kemari.

Nengah undang- undang mit baru nya ku Penguang, orang bempu ukui meseti mandangka ukui sida udah dituchuk enggau vaksin anti-rabies sebedau lisin ulih dikeluar tauka disambung.

Undang-undang tu mega netapka lisin diberi ungkup timpuh 3 taun nengah bayar RM30 ungkup seiku ukui ke udah dipeliri sereta RM90 ungkup siku ukui ke bedau dipeliri.

Orang ke nginang ukui lebih ari tiga iku deka dipinta mayar lisin RM90 ungkup seiku ukui tambah ke udah dipeliri ungkup timpuh 3 taun sereta RM270 ungkup seiku ukui kebedau dipeliri.

Undang- undang mega netapka PBT ngeluarka tag besi nyadika identiti ( ID) ukui lalu meseti dilekat enggau ID Elektronik.

“Tajapia, undang-undang tu enda diterit ba ukui ke diempu sedadu, polis, kastam, Opis Veteriner sereta ijinsi perintah ke bukai.

“Undang-undang tu mega enda diterit ba ukui ke diinang orang di rumah panjai tang sida meseti nentuka ukui ke ditupi nya dituchuk enggau vaksin anti-rabies,” ku iya.

Entara penetap bukai, orang bempu ukui meseti ngeriput ngagai PBT enti ukui sida diberi ngagai orang bukai dalam timpuh 30 hari lalu dipinta mayar RM10.

Undang- undang mega netapka kedai jelu ke nyual ukui tauka nupi ukui meseti ngulihka lisin ungkup palan dagang sida.

Bayar lisin ungkup orang nupi ukui ditetap RM1,000 setaun lalu kedai ke nyual ukui dipinta mayar lisin RM200 setaun. Enti nadai lisin sida tau diukum RM10,000 (pemadu besai).

Bela datai Sekretari Mendam Opis Menteri Kunsil Kandang Menua enggau Pengawa Berumah Bakrie Zaini.