Kemeranka budaya ti nyulut ba pengidup besesehari, ku Dennis
LONG LAMA: Kaban Kunsil Nengeri ( ADUN) Telang Usan, Dennis Ngau ngansak peranak ba sitak nya ngemeran budaya ti nyulut ba pengidup sida besesehari ngambika Telang Usan ngerembai sereta nyadi menua lantang endur diau.
“Bala kita meseti beratika pekara tu nyadi jalai idup enggau ngemanjaika nya ngagai sida ti bekereja ditu.
“Perintah nengeri ngelangkar enggau bejalaika pengawa mai pemansang ngagai Telang Usan ba semua sukut, peranak asal menua tu patut mega nyaup semua pengawa dipejalai perintah nengeri.
“Aku pechaya semua kitai bisi pengingin diau ba rampa ti meruan sereta seruran berasai gagit ba pengawa dikereja kitai besehari sehari.
“Tau dikeingat, pekara disebut aku tu ukai pekara ti baru ba idup tang udah lama dikemeran bala kitai, nyengkaum sida ke diau ba Pasar Long Lama bisi chara sida empu, tang tu enda mida kitai.”
Kitai begunaka semua peranak Telang Usan sepenemu enggau berengkah ngemeranka budaya tu ngambika juluk kitai deka meda Telang Usan, kelebih agi Pasar Long Lama enggau semua rumah panjai enggau pengentap pendiau nyadi menua ti lantang endur diau.
Budaya ti nyulut nyauka mungkur serap pekara ba jalai kitai beridup dalam komuniti. Ari rumah enggau endur kereja ti meruan sereta ber- esi, tau dibai ngagai mengeri endur kita diau, nyengkaum ibuhka pengelantang orang bukai ba mengeri baka Long Lama.
Ku iya, baka ni chara orang Jepun bejaku pasal dunya ke alai bansa Jepun ngemeranka disiplin diri tinggi enggau chukup angkunka basa, nunda chara idup ba menua Jepun, serata dunya bebasaka orang Jepun. Tu nyengkaum peranak menua ke alai ulah baka tu jauh ari pekara nyata. Tang pengudah sida nemuai ngagai menua Jepun, genap iku sida besetuju ke alai budaya penyulut patut nyadi chara idup.
Dennis Ngau mansutka jaku tu lebuh bejadika Program Komuniti Kaunsil Pelilih Marudi 2018 ba Pasar Long Lama pagi kemari.
“Reti iya, idup ti ngemeranka budaya ke nyulut tau enggau ulih dijapai nengah ubah mimit ari siti ulah. Kitai meseti bepun ari diatu lalu ngayanka teladan ti manah ngagai rebak biak kitai.
“Aku nemu peminta tu mar tang nyadi pengari rayat kita, aku meseti ngereja semua pengawa ti tau mai kitai maju enggau pekara ti nyadi ngelingi kitai sehari tu enggau pagila,” ku Dennis nambah.
Ku Dennis, kitai enda ulih semina nejuka opis enggau ejensi perintah aga ngasuh menua kitai meruan lantang endur diau, baka kitai inginka rampa menua ti beresi enggau meruan, likun enggau nadai sebarang pengawa salah, mayuh aktiviti, mansang nge- rembai enggau ke bukai.
“Enti nadai siku gawa, taja pekara nya mit, kitai deka enda ulih ngaga bida ngagai mengeri tauka rumah panjai. Sinu amat nyauka semua peranak Malaysia enda ngira diri empu aja tang besaup gawa bela deka meda asil nya.
“Aku beratika pengelurus pengawa dipejalaika Kepala Menteri Datuk Patinggi Abang Johari Openg enggau semua kabinet iya nentuka nengeri tu, kelebih agi kandang menua pesisir nyengkaum sitak Baram deka dikemansang.
“Tu pengawa bebendar dipejalai tang nengeri dekaka pemansang sebala dipejalai ba nengeri kitai, nya kebuah kitai meseti nemu pekara tu lalu begempung sereta bekerejasama nempa Telang Usan nyadi menua ti lantang endur idup.
Dennis Ngau udah nya madahka sitak Telang Usan enggau Mulu ti dibungkur Ejensi Pemansang Tanah Tinggi (HDA) deka meda kereja infrastruktur chakah dipejalai berengkah ari taun baru, ti semina digaga ari belanja Nengeri Sarawak aja.
Nya kebuah ku Dennis, iya ngelalau peranak Telang Usan ngemeranka Penyulut Budaya ti mungkur raban gawa perintah, kunteriktor ti bulih kunterik kereja, bala nembiak ti benung besekula sereta mensia mayuh enggau bala pengusung, dipelaba deka nambah pengudah Jematan Long Lama enggau jalai nyambung Pasar Long Lama enggau Pelilih Mit Long Bedian sereta kesemua jalai ngagai genturung pendiau ba sepanjai jalai ti dikemanah perintah nengeri berengkah ari taun 2019 tembu.
Iya ngansak semua staf perintah ti gawa ba mayuh bengkah opis perintah ba Telang Usan ngambika gawa memanah sereta meri servis ke pemadu manah ngagai rayat.
Iya mega ngelalau raban kunteriktor ti ngempu kereja ba Telang Usan ngambi gawa enggau badas laban rayat udah auska projek infrastruktur enggau penyikap perengkaguna digaga nitihka spesifikasyen ngambika ulih tan lama.
“Mayuh kes udah nyadi ke alai jalai genturung pendiau semina tan beberapa bulan aja ketegal kereja enda meruan digaga. Tu reti ngemeranka budaya ti nyulut ku aku, nadai jalai muntang,” ku Dennis ngelalau.
Dennis Ngau mega ngelalau peranak Telang Usan bejalaika pengawa sida nurutka sebarang peminta ari raban kaunsil kandang menua ti begunaka keresa sida dikena nyeliah ari masau jam gawa, belanja ngaga kereja mayar enggau pekara bukai.
“Tu mega reti pekara ti disebut idup ba Budaya ke Nyulut,” ku Dennis nambah.
Sama bisi datai Chairman MDC, Kaunsilor Edward Mendai, Pemesai Pelilih Telang Usan, Baru Taii, Kaunsilor Simpson Njok Lenjau, Penghulu Desmond Yap, bala kaunsilor MDC enggau lebih 300 iku bala bukai.
Dennis udah nya ngansak MDC nampung pejalai program belalauka komuniti sida, ba penemu iya, chukup manah ungkup peranak menua pesisir ari Telang Usan.