Kaban Komiti Kabinet MA63 patut dipilih baru laban enda sebela: KM
LIMBANG: Penyulut nembiak Dayak ba pelilih menua tu seruran diberi pemerat nengah pengawa ngatur Seminar Penyulut Pelajar Dayak 2018 ti diatur ditu kemari.
Seminar diatur Serakup Bisaya Sarawak (PBS) enggau Sarakup Dayak Iban Sarawak (SADIA) Pampang Limbang digulu 153 iku nembiak Pom Lima enggau Pom Enam ti ngaul bala nembiak ari tiga buah sekula sekondari iya nya SMK Kubong, SMK Medamit enggau SMK Seri Patiambun Limbang.
Kaban Kunsil Nengeri (ADUN) Batu Danau Paulus Palu Gumbang dekaka bala nembiak netapka kuing ti nyata sereta enda mantul ngapa ngambika nempa diri nyadi mensia ti nyulut enggau mujur ba pelajar.
Iya madahka pengawa pelajar beguna amat ti patut diberi pemerat sereta ransing belajar ngulihka pemutus nyulut ba peresa besai.
“Pemutus peresa beguna amat laban deka nentuka kuing pengidup kita dudi hari.
“Bala sida ti enda mujur anang mantul ati laban agi tubah awak disediaka peritah ungkup kita ngemansangka diri,” ku iya kemari.
Sama datai, Direktor Palan Pematih Pengajar Miri, Gumbang Pura, Sapit Chairman Program Narawi Aba, Temenggung Nicholas Buyok Pura enggau Penghulu Ekit Awang.
Paulus madahka raban nembiak ti enda entu mujur patut ngena pengelandik ti dikembuan nampung pelajar ba kolej teknikal.
“Nya kebuah pekara pelajar beguna amat dikena nentu enggau nyamin pengidup dudi hari menyana agi.
“Sida ti enda entu nyulut tau milih belajar ba kolej teknikal laban mayuh pengawa puang disedia kelebih agi sida ti ngembuan sekeda pengelandik,” ku iya nampung.
Bala nembiak patut ngena memanah jam sida ngulang pelajar ngambi bulih pemutus manah ba peresa besai ti deka datai, tandu iya. KUALA LUMPUR: Komiti Kabinet mutarka isu Sempekat Malaysia 1963 (MA63) patut sebela ari sukut penyampau pengari iya dikena nentuka juluk mulaika baru pengelebih ngagai Sabah enggau Sarawak dijapai nengah chara adil.
Kepala Menteri, Datuk Patinggi Abang Johari Tun Openg madahka penyampau pengari nya diatu enda sebela pemayuh laban semina dua pengari ari perintah Sarawak ba komiti nya, iya empu enggau Luyar Besai Sarawak, Datuk Talat Mahmood Abdul Rashid.
Menteri Kereja Raya, Baru Bian ti bela dilis nyadi pengari Sarawak, taja pia enda ngarika Perintah Nengeri.
Nya kebuah Abang Johari madahka perintah nengeri udah meri langgur penemu ngambi milih baru raban komiti nya, belalauka komiti antara perintah.
“Perintah besai udah ngenukuka kitai nyadi bakih bela ba pengawa numbuhka Malaysia. Nya alai, pekara ti patut dipejalai iya nya pengari ari Perintah Sarawak, Perintah Sabah enggau Perintah Besai patut sebela.
“Udah nya, baru kitai ulih berandauka senentang isu ti udah nyadi batang jurai ba MA63 laban enti enda, enti pemutus ngemendar dipejalai ngena undi majoriti, kitai deka alah,” ku iya.
Iya mansutka jaku nya lebuh dirandau pengudah program Townhall # TanyakAbgJo beserimbai enggau Lan Berambeh Anak Sarawak 2018 ditu, apin lama ke udah.
Komiti Kabinet mutarka isu MA63 ba pengawa mulaika pengelebih ngagai Sabah enggau Sarawak deka betuaika Menteri Besai, Tun Dr Mahathir Mohamad.
Kaban komiti tu mega datai ari Kepala Menteri Sabah, Datuk Seri Mohd Shafee Apdal, Menteri Wang, Lim Guan Eng; Menteri Pekara Ekonomi, Datuk Seri Azmin Ali, Menteri Komunikasi enggau MultimediaGobind Singh Deo, enggau Menteri Luar, Saifuddin Abdullah.
Kelimpah ari nya, Menteri Dagang Antarabansa enggau Industri, Darell Leiking, Menteri Perengka Pengangkut, Anthony Loke Siew Fook enggau Ketuai Sekretari Menua, Datuk Seri Dr Ismail Bakar.
Bela nyadi kaban komiti iya nya Akim Besai Sabah dan Sarawak, Datuk David Wong Dak Wah, LuyarBesai Sabah, Zaleha Rose Pandin, Luyar Menua, Tommy Thomaes serta Profesor Undang-undang Universiti Malaya (UM), Prof Emeritus Datuk Dr Shad Saleem Faruqi.