Apai indai ba menua pesisir patut seruran beratka pelajar anak
MIRI: Apai indai mesti bekerejasama nentuka bala anak sida nerima pelajar sekula ti beguna amat ungkup pemujur enggau pengidup menyana dudi hari sida.
Menteri Muda Orang Indu, Ruang Bilik enggau Pemansang Anak Mit Rosey Yunus madah, pemujur ba pelajar besai amat guna laban pekereja deka begunaka tikas pelajar tinggi dikena nangkup peminta teknologi kereja jemah.
“Bala anak mesti mujur nembuka sekula sida enggau ulih teulihka penyulut ba pelajar ti nyadi jalai nuju pemujur idup dudi hari,” ku Rosey lebuh bejadika Pekit Main Bol diatur Serakup Apai Indai enggau Pengajar (PIBG) Sekula Primari (SK) Bulau, Bekenu kemari.
Sama bisi datai Ketuai Indu PBB Bekenu, Hadijah Shiekh Kassim enggau Ketuai Raban Bansa Kampung Bulau Amin Antin.
Bisi 20 tim datai ari Miri, Bintulu, Bakong enggau Bekenu ngambi bagi ba pekit main bol nya.
Nitih ku Rosey, bala anak ukai semina mesti nyulut ba pelajar enggau lumba aja, tang sida mega patut nemu baka ni matak kaul, andalka diri enggau runding meruan ngambika pegari ba idup sida jemah.
Ku iya, apai indai mesti lurus enggau puh mantu ngemansangka pelajar bala anak sida ngambika mujur ti nyadi kunchi pengerembai rebak nembiak.
Ku iya, nadai sukung ari apai indai, pengajar enggau raban akademik, puntan pengawa nyeridi bala anak sida nyadi pegari enggau tampak ba pelajar laban begunaka sukung ari semua raban ti dikaul.
Ku Rosey, pelajar nyadi reta pemadu beguna enggau bekuasa ti ngasuh bala anak sida nyapai pemujur ba idup sida.
Nya kebuah iya keran meransang apai indai, kelebih agi ba menua pesisir seruran ngemeratka pekara pelajar bala anak.
“Udah nyadi tanggungpengawa apai indai meri peransang enggau meransang bala anak sida belajar bebendar,” ku iya.
Iya madahka apai indai patut suah agi berandau enggau bala pengajar nengah PIBG, berandauka isu enggau penanggul ti nekul bala anak sida belajar sereta ngemanahka kesemua penyapai ba akademik.
Rosey beambika chunto baka ni SK Bulau nempa bala pemain bol ti manah ba tikas sekula primary ke alai nembiak SK Bulau mujur ngarika bagi menua Miri.
Ku iya, tu siti chunto manah amat ke alai apai indai enggau pengajar bekerejasama nentuka sekula nyulut ba pelajar enggau lumba.
Berebak enggau nya, Rosey ngemendarka geran RM2,000 ungkup PIBG SK Bulau.