Saup perintah nagang pengerekai penyakit rabies
KAPIT: Pemesai Pemadah Kapit, Judy Henry Anchangan madah isu rabies nyadi batang randau mensia mayuh ba pasar diatu.
“Isu rabies nyadi isu balat dikerandau diatu. Udah nyadi tanggpengawa kitai nyaup perintah nagang rabies ari ngerekai. Ketup ukui tau munuh.
“Lebuh mindah ngagai rumah panjai di Belaga, Sungai Asap enggau Sungai Koyan, Pelilih Belaga, meda mayuh ukui bekedayau, bisi asai ati nangika pengelikun diri. Agi mit menya, kala ngasaika digagai ukui ti meruan dikeingat. Tentu mega kenang ti enda manah,” ku iya.
Judy ngelalau bala pesereta ti datai mendingka licha dikenataika Pemesai Pengerai ari Opis Pengerai Kapit, Dr Ngu Min Hiang enggau Opis Pengerai Mensia Mayuh enggau Rampa Menua Kaunsil Pelilih Kapit, Josephine Layang senentang rabies enggau chara dipejalaika raban bekuasa dikena nagang igi penyakit ti tau munuh tu ari ngerekai.
Iya ngelalau sida bekunsika penerang beguna ngagai diri sebilik enggau bala bakih ti diau besemak. Iya pechaya, enti semua bejalaika pengawa sida nyaup perintah gawa, asil mega deka manah agi.
Timbal chukup manah diterima lebuh Opis Pemadah Kapit ngatur Program Licha Rabies ba bilik konferen ba Palan Sivik Kapit ditu ujung minggu nyin tadi.
Bala pesereta datai ari opis perintah nengeri enggau perintah besai, bala ketuai komuniti enggau mensia mayuh. Pemesai Perubat ari Opis Pengerai Kapit, Dr Ngu Min Hiang meri licha pasal rabies lalu Josephine Layang belicha pasal chara dikena nagang ti dipejalaika raban bekuasa bekaul bekerejasama enggau Opis Veterinar Kapit enggau ‘Victor Control Unit’ Opis Pengerai Kapit pengudah Kapit dituku kandang menua kena rampit rabies.
Atur pengawa kena 14 ngagai 15 September ba Komplek Nengeri Bletih, Opis Veterinar meri tuchuk vaksin nadai bebayar ngagai 224 iku ukui ari 152 iku sida ti ngempu ukui.
Kena 3 Oktober, bisi 10 iku ukui udah dituchuk vaksin ba Chelseas High, 4 Oktober diatur ba Taman Galong enggau Taman Indah sepanjai Jalai Selirik. Udah nya kena 6 Oktober, pengawa nuchuk vaksin dipejalai ba Padang Bilun Lama, Jalai Padang Bilun ditu.
Lebuh rabies ngerampit ngagai 46 pelilih menua di serata nengeri, bisi 12 iku dituku parai, ngujungka rayat berasai irau kelebih agi enti sida diau ba kandang menua besemak enggau endur kena rampit, ukui lelang mayuh bekedayau tauka mayuh ukui ti bisi lisin.
Sarawak ngenuku kes rabies keterubah ba Serian kena 1 Julai 2017. Taja pengawa nagang rabies ari ngerekai bisi dipejalaika Komiti Pemutar Penusah Ngenyit Nengeri Sarawak, penerang berita kena 2 Oktober.
Antara SOP dikemendar kena nagang rabies ari ngerekai ti dipejalai raban soldadu enggau General Opera- tion force (GOF – Police) ba garis entara menua SarawakKalimatan. Ngerah raban Bekuasa Kandang Menua neritka kuasa undang-undang ti meri lisin ngagai pengempu ukui lalu sida dilalau ngurung ukui ba laman rumah.
Opis residen enggau ejensi bekaul bukai ngempang jalai dikena matau pejalai (mindahka) ukui, ukum di baruh Veterinary Public Health ordinance 1999, ngagai ukui ti dibai mindah ari kandang menua kena rampit rabies ngagai kandang menua bukai ba nengeri tu. Ukum RM5,000 tauka jil tiga bulan tauka kededua ukum nya.
Opis Pengerai numbuhka ‘Dog Bite Clinic’ ba Sepital Sibu, Kapit enggau Miri. Perintah nengeri mega merambu Undang-Undang ukui baru 2018 enggau atur pejalai matau pengawa ngintu jelu inang.
Pengawa dipejalaika Komiti Mutar Penusah Ngenyit Nengeri Sarawak enda entu mujur dikena nagang rabies ngerekai laban majak mayuh kandang menua kena rampit.
Nama kelai ukui kena rampit rabies? Ari iku chechegit, begantung. Takutka ai enggau rauh. Rerangap enggau meliur. Siga enggau ngeyauhka diri. Takut meda utai tampak sereta ngetup sebarang utai.
Mayuh jelu baka tupai, mayau, chapi enggau babi babas ambika chunto tau rampit rabies. Tang 99 peratus rabies nganu mensia datai ari ketup ukui.
Kelai rabies ba tubuh mensia, tabin lebuh ari 39 degree centigrade. Enggai ngirup ai, tubuh angat, pedis deka bejaku, pedis pala enggau asai sebening.
Nama penyadi pengudah diketup ukui? Virus rabies deka tama ngagai tisu ari abi ketup ukui. Virus deka tumbuh besai dalam tisu. Virus mindah nengah urat saraf ngagai untak. Virus ba untak ngujungka pedis pala. Udah nya virus makai rengka dalam tubuh mensia.
Baka ni nagang rabies? Seliahka diri ari ketup ukui. Nyema kena ketup ukui, basu ngena sabun dalam ai beresi tekala nya pengelama 15 minit. Berumban berubat ngagai klinik tauka sepital ke besemak lalu padah ngagai sida ti gawa pasal abi ketup ukui.
Pemesai Perubat deka beratika penalam abi ketup ukui, semina abi ba kulit aja, dalam tauka ke bukai. Perubat enggau makai ubat. Enti sema abi ketup balat, tuchuk vaksin enggau dipasuk berubat ba wad ba ‘Dog Clinic’ ngambika dipatau.