Tatak timpuh mangku penuduk dua penggal nguntungka rayat

KUCHING: Langgur penemu natak siku menteri besai enggau kepala menteri semina megai pangku pengawa pengelama dua penggal aja deka meri pemaik ngagai rayat, nengeri enggau menua, pia ku siku penganalisis poltik.

Pengelicha kanan Universiti Malaya Prof Madya Dr Awang Azman Awang Pawi madah ari pengawa besilih menteri besai enggau kepala menteri, rayat deka ngasaika langgur penemu enggau strategi baru bekaul enggau pemansang.

Kemari, Menteri Besai Tun Dr Mahathir Mohamad mantaika langgur penemu ngambika timpuh megai pangku pengawa siku menteri besai enggau kepala menteri ditatak ngagai dua penggal dikena ngerumban pengawa ngemaruka sistem politik menua tu.

“Indonesia enggau Amerika Syarikat udah ngemeranka polisi dua penggal tu,” ku Awang Azman seraya nerang ba konteks Malaysia, pengawa natak dua penggal nya ulih nyekat monopoli kuasa ngagai bala ketuai.

Kenu ku iya, ulah monopoli kuasa tau nempa perintah autokratik laban sida deka kelalu kering lalu ngasuh sida ngemeranka politik wang dikena ngulihka sukung enggau kuasa.

“Bala ketuai pedis deka ngetuka ulah baka nya lalu nadai pengawa meresa enggau nyemela ti chukup dipejalai, ulah nya deka ngemai pengawa kronisme enggau nepotisme. Taja pia, enti tatak dua penggal tu dipejalai, iya deka nentuka demokrasyen ti dikemeran deka seruran dijaga,” ku iya madah ngagai Bernama.

Ku Awang Azman, ba konteks Sarawak, langgur penemu tu tau dipejalai dikena nentuka bisi pengawa kelestarian politik rebak dulu enggau baru, kelimpah ulih nentuka atur pengawa parti politik baka Gabungan Parti Sarawak ( GPS) enggau atur besilih kuasa bejalai manah, ukai semina ba pangku pengawa kepala menteri aja, tang mega sapit kepala menteri.

Ba lansa bukai, Datuk Peter Minos madah taja ditatak dua penggal nya manah dipejalai dikena nagang siku orang ari megai kuasa kelalu lama, tang iya mega tau ngemai penanggul ngagai bala ketuai ti manah ngelanggur strategi enggau penemu sereta ninggalka legasi.

Minos, ti mega Chairman Majlis Perbandaran Kota Samarahan (MPKS), madah penggal keterubah megai pangku pengawa suah agi deka dikena siku ketuai ngelanggur enggau ngaga pemutus sereta bejalaika pengawa dikena nentuka siti pekara nya mujur dipejalai, kelimpah ngulihka kerejasama ari raban bukai.

“Datai ba penggal kedua dikena bejalaika semua perambu enggau meruan, ke alai orang nya deka lemi pala patung. Timpuh dua penggal tauka abis lama 10 taun nyangka kelalu pandak ngagai siku ketuai ninggalka abi jari sida,” ku iya.

Seriris enggau nya ku Minos, isu natak siku ketuai mangku pengawa semina dua penggal aja patut diperatika baru ba semua pekara laban pangka iya besai amat enti dipejalai, nya kebuah iya ngarapka bala ketuai tetingi ba Kuala Lumpur enda berumban ngaga pemutus bekaul enggau pekara nya.

Kepala Menteri Sarawak Datuk Patinggi Abang Johari Tun Openg mansutka jaku, taja langgur penemu nya dibantai enggau dikemendar ba Parlimen, iya enda deka dikena ba Sarawak lalu nitih ku iya, kebuah pia laban Sarawak ngembuan autonomi bekaul pengawa nyiri enggau timpuh megai pangku pengawa bala menteri iya.

“Sarawak enggau Sabah, nengeri ti ngembuan autonomi. Kami patut ngubah konstitusyen dulu agi sebedau langgur penemu nya ulih dipejalai ba Sarawak,” ku iya madah ngagai pengarang berita ditu. — Bernama