Sida diperansang patut temegah mantaika penyelai main asal
MIRI: Nembiak Dayak rebak baru patut seruran mantai enggau ngetanka penyelai main asal enggau adat lama ti ditampung kenyau ari kelia.
Sida mega patut angkun enggau berasai temegahka main asal sida, ku Kaban Kunsil Nengeri (ADUN) Telang Usan Dennis Ngau.
“Kitai mesti anang enda ingatka penatai asal diri nyengkaum main asal kitai.
“Engka ketegal bala kita ngembuan tikas pelajar tinggi, ukai reti kita enda ingat tauka muai main asal ari raban bansa kita empu tauka berasai malu ngaku bansa diri. Tu enda patut nyadi lalu kitai mesti ingatka nya,” ku iya lebuh bejaku bejadika Pekit Ngajat enggau Betabuh diatur Serakup Dayak Miri (DAM) ba sebuah hotel ditu, apin lama ke udah.
“Kitai bisi ditu sehari tu asil ari pemanah pengawa udah digaga bala aki ini kitai menya, ti ngasuh kitai ulih bediri sama tinggi, duduk sama baruh, sebaka enggau raban bansa bukai ba Sarawak enggau Malaysia,” ku iya nambah.
Dennis muji pengeransing
Engka ketegal bala kita ngembuan tikas pelajar tinggi, ukai reti kita enda ingat tauka muai main asal ari raban bansa kita empu tauka berasai malu ngaku bansa diri. Tu enda patut nyadi lalu kitai mesti ingatka nya. Dennis Ngau ADUN Telang Usan
raban DAM ngatur pekit keterubah lalu iya ngumbai tu nyadi kenang beguna amat dikena ngali penau raban bansa Dayak.
“Aku temegah ati meda pengeran besai diayanka raban DAM ba pengawa ngatur aktiviti ti tuju iya ngempung enggau ngemansangka raban bansa Dayak kelebih agi sida ti diau di Miri sereta mega ngetanka main asal enggau adat lama sida.
“Kitai endang ngarap enggau inginka pemanah main asal bansa Dayak deka seruran diintu meruan.”
Dennis nyemetak madahka pekit nya teulihka pemujur asil ari pengawa dipejalaika raban bansa Dayak dikena ngetanka kelai sida.
“Orang ti nemu mantaika tanda asal sida suah dipeda ngembuan ulah ti siru, nadai ngira penempa diri sida. Sida tu ti balat rinduka main asal lalu suah mega nyadi orang ti mulia enggau tikas disiplin tinggi,” ku Dennis.
Berebak enggau nya, Dennis ti ngarika Datuk Amar Douglas Uggah Embas mega nyuaka chek RM50,000 ari Sapit Kepala Menteri ngagai DAM ungkup aktiviti sida.