RECODA, Agrobank nyain MoU mantu pemeranak puku, orang dagang agro

KUCHING: Lembaga Pembangunan Koridor Wilayah ( RECODA) nyain Sempekat Pemereti Ati (MoU) enggau Agrobank Sarawak, ti deka bekerejasama mantu pemeranak puku enggau orang dagang agro.

MoU nya disain nyerumba Sarawak Agrofest 2018 ti datur ba Palan Konvensyen Penview ( PCC), ke alai RECODA diarika Ketuai Pemesai Eksekutif, Datu Ismawi Ismuni enggau Ketuai Pemesai Strategik Agrobank, Mohamad Taufik Mahamad Zakaria.

Tuju MoU nya deka nyendiaka belanja ngagai pemeranak puku enggau orang dagang agro dalam kandang Kuasa Tau Dikena Baru Koridor Sarawak (SCORE).

MoU nya deka mantu pemeranak puku enggau orang dagang agro ti bisi potensial dalam tiga ejensi pemansang ti ditumbuhka di baruh RECODA iya nya Ejensi Ngemansang Ulu Rajang ( URDA), Ejensi Ngemansang Tanah Tinggi (HDA) enggau Ejensi Ngemansang Kandang Utara (NRDA), program melanja tu endang dikena ngemudahka orang dagang agro nyereta betanam betupi komersial sereta meransang orang dagang ngambi bagi dalam pemansang rentayan bekal betanam betupi ba endur nya.

Bisi datai lalu ngemataka pengawa nyain MoU nya, Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua sereta Chairman HDA, Datuk Amar Douglas Uggah Embas.

Sama bisi datai, Menteri Muda Pemansang Tanah Adat Datuk Roland Sagah; Menteri Muda Betanam Betupi Dr Abdul Rahman Ismail enggau Penyanding Penemu Pengawa Mansik Sains Sarawak, Tan Sri Alfred Jabu Numpang enggau ke bukai.