Dikena nyikap nembiak rebak baru ti begunaka sida ngulih sereta meretika penemu
MIRI: Juluk ngangkatka tikas pelajar Malaysia ngagai standard antarabansa deka begunaka penyereta semua sektor menua, sekalika bala nembiak, pengajar, apai indai, komuniti, orang dagang enggau semua renggat perintah.
Kaban Kunsil Nengeri ( ADUN) Pujut, Dr Ting Tiong Choon madahka sistem pelajar kitai seruran berubah enggau dikemaru seriris enggau ubah evolusyen rama.
“Dikena nyikap rebak biak kitai nangkup jeman Ke21, pelajar baru kitai patut nangkup ubah tu ngambika bala nembiak ulih ngulihka penemu ari semina nitihka penemu aja,” ku Dr Ting lebuh bejaku ba Pengawa Nyua Anugerah enggau Apresiasyen SMK Dato Permaisuri diatur ba Hotel Imperial, Miri kemari.
Sama datai Prinsipal SMKDP Miri, Haslinda Jedi, Chairman PIBG SMKDP, William Lim, Ketuai Nembiak DAP Miri, Peter Hee.
Nitih ku Dr Ting, siti ari ubah strategi dikena ngubah sistem pelajar kitai bala dilangkar ba Malaysia Education Blueprint (PPPM) 2013-2025 iya nya pengawa kunsi bala apai indai, komuniti enggau sektor peribit.
Ku iya, kitai nemu pengawa belajar di luar sekula lalu ulih ditampung ba rumah enggau dalam komuniti.
Nya kebuah beguna amat ubah ari semina belajar ba sekula aja ngagai sistem belajar ari kaul apai indai, komuniti enggau sektor peribit, ku
Dikena nyikap rebak biak kitai nangkup jeman Ke-21, pelajar baru kitai patut nangkup ubah tu ngambika bala nembiak ulih ngulihka penemu ari semina nitihka penemu aja. Dr Ting Tiong Choon ADUN Pujut
iya madah nyemetak.
Ba lansa bukai, ku Dr Ting, kitai patut ngemanah enggau begulaika kaul apai indai, sereta mega ngemesaika agi kaul komuniti ba pelajar bala anak.
Ari nya ku ADUN Pujut, nyadi apai indai, kitai patut berunding enggau belemati sekalika runding chara lama, ke alai sekula menggi tanggungpengawa ngagai pelajar bala anak kitai chukup kena nangkup peminta jeman Ke-21.
Tambah mega, kemaya hari, apai indai patut nentuka pelajar ti dipun ba sekula deka ditampung maya nembiak mulaika diri ke rumah, ku iya nambah.
“Dikena nyapai nya, bala ketuai ba sekula enggau rumah bela patut seruran meransang belajar chara kreativiti enggau inovasyen. PIBG mega tau nyadi peransang ba peneleba pelajar baru tu,” ku iya.
Seraya, dulu ari nya, Dr Ting diberi basa bejadika Pengawa Nyua Perais Penyulut enggau Apresiasyen SMK Dato Permaisuri, ti nyadi hari ke mai kenang chukup manis.
Iya meri terima kasih enggau jaku puji ngagai SMK Dato Permaisuri enggau PIBG ti mujur ngatur program besai ninting taun ba sekula nya.
Baka ti ulih dipeda kita, ku iya, tuju pengawa diatur, keterubah, Apresiasi – ngenang jasa bala pengajar, ti udah ngelimpangka jam enggau gawa ngajar kitai kenyau ari enam taun ke udah, lalu kedua, Permata – Gelar penyulut ngagai bala nembiak ti nyulut sereta pegari sekalika ba akademik tauka ukai akademik tauka kededua iya.
Enda tinggal mega, ba runding aku, semua apai indai patut nerima puji ba kededua pekara tu, ngenang jasa enggau nerima perais penyulut tu, ku iya nambah.
Lansa bekaul ku iya, beberapa taun ke udah, iya baka nembiak bukai ditu, nembuka pelajar SPM enggau enda nemu kini kuing udah nya.
“Rambau nya, mayuh pekara dipejalai ba sekula semina datai ari bup aja, lalu kami belajar ari pengajar, kami ngingatka pelajar sereta ngarapka bulih markah manah.
“Kemaya hari, kitai meda gaya pelajar udah ngerembai ari chara lama. Bala nembiak datai ba sekula ukai semina deka belajarka penemu tang mega diseridi, diajar, nyangka nya kebuah kitai bisi pengandal enggau penemu, sereta idup ba pengidup ti meruan, ku iya.
“Aku pechaya, kitai ngerami pengawa sehari tu seriris enggau juluk deka meri peransang ngagai bala nembiak ngambika nyapai penyulut ba semua bidang,” ku iya madah silik.