34 iku ukui lelang ditangkap maya operasyen nagang pengerekai rabies di Bintulu

BINTULU: Sepenyampau 34 iku ukui lelang udah ditangkap ba beberapa endur antara 19 ngagai 23 Oktober berindik ari pengerekai rabies ba bagi menua nya.

Nitih ku Unit Pemeresi Menua Pesisir enggau Perengka Guna Mensia Mayuh, Kaunsil Pemansang Bintulu (BDA), operasyen nya dipejalai dikena nagang pemayuh ukui lelang sereta nagang igi penyakit rabies ari ngerekai.

Dua bengkah endur ditu udah dituku kandang menua pemadu baru kena rampit rabies di Sarawak.

Unit nya madahka sepenyampau 500 pamphlet enggau surat tesau udah disadung rambau program tuchuk vaksin kena 20 enggau 21 Oktober.

Tu nyengkaum 100 surat tesau disadung sepanjai genturung pendiau Sg Selad, Sg Setiam enggau Sg Seterus.

Statistik ari Opis Servis Veterinar Bintulu madahka sepenyampau 2,597 ukui udah dituchuk vaksin anti-rabies di bagi menua Bintulu antara 11 nyentuk 21 Oktober.

Sepenyampau 1,473 pengempu jelu inang datai mai jelu sida ngambika dituchuk vaksin ba timpuh nya.

Ba pengawa nuchuk vaksin kena 20 Oktober, sepenyampau 616 ukui udah dituchuk vaksin seraya 834 ukui dituchuk kena 21 Oktober.

Sapit Kepala Menteri Datuk Amar Douglas Uggah Embas ba sebengkah penerang dikeluar ari Komiti Pemutar Penusah Ngenyit Nengeri kena 18 Oktober ngenukuka Taman Bandar Jaya, Jalai Tun Hussein Onn enggau SK Sg Selad, jalai tebing tasik km35 Bintulu- Kuala Tatau nyadi kandang menua ke 45 enggau 46 ba nengeri tu kena rampit rabies.

Iya ngingatka pengempu ukui deka diukum enti nejuka ukui inang sida lepau kandang menua kena rampit rabies, tauka dibai mindah ari kandang menua dirampit rabies enggau nadai pemendar betulis ari raban bekuasa veterinar nengeri.

Kededua ukum di baruh Section 37(2) & (3) of the Ordinance, enggau ukum enda ngelui ari RM2,500 tauka jil enda lebih ari dua taun, tauka kededua ukum.