SWP minta PH, GPS enda ngena isu elawin Tuai Rumah nyadika pekara politik
SIBU: Sarawak Workers Party (SWP) minta parti politik Pakatan Harapan (PH) enggau Gabungan Parti Sarawak ( GPS) enda bekenaka isu elawin Tuai Rumah nyadika politik sida.
Presiden parti tu, Munan Laja madah, isu tu enda patut dipetalat laban dudi hari ila kedua-dua parti nya bela sama ngenyadika sukung minta undi raban nya.
“Nya alai, ba aku, baka PH ti enda setujuka TR ti dipilih ari politik nerima 70 peratus elawin ari perintah besai enda engkeman.
“Kebuah pia laban kitai enda nemu ni bagi TR ke dipilih ari politik tauka ukai laban nadai ditulis ba setipikit sida.
“Ulah baka tu mega berupai bendar enda bebasaka bala TR ti nyadi tuai megai rumah panjai,” pia ku iya madah maya nimbal penerang ke dipansut Menteri Kerja Raya Baru Bian, kemari.
Ensana, Baru ba penerang iya madahka Tuai Rumah ti enda dipilih ngena sistem demokrasi ari peranak rumah panjai tang dichiri ketegal dipilih raban politik GPS sereta enda disukung peranak deka enda diberi elawin 70 peratus ari perintah besai PH.
Baru madah, bajet ke diungkup perintah PH ngagai GPS semina ulih dibayar perintah GPS Sarawak ngagai semua TRenggau Tuai Raban Bansa ke dipilih nengah sistem demokrasi ari peranak rumah panjai tauka genturung menua.
Nambahka jaku iya Munan madah, manah agi semua TR ti chukup pintu sama bela diberi elawin magang kelimpah iya ke empai nerima setipikit mega meseti diputarka.
Sebedau tu mega, Munan nengah penerang madahka iya nemu ngelama tu pengawa nagang Tuai Rumah enda ngemendarka rumah panjai sida ditiki parti politik ke bukai kelimpah ari Barisan Nasional (BN)/GPS endang lama udah nyadi.
Tu ku iya, diumbaka enggau isu ke diatu ti nagang TR enggau Ketuai Raban Bansa datai ngulu program ke ukai diatur perintah GPS.
“Pekara baka tu udah mayuh ngujungka peranak rumah panjai belaya enggau pangan diri nyentuk bisi nya bepechah rumah.
“Penemu tu enda manah sereta salah ba menua demokrasi baka kitai,” ku iya madah baru.
Ku Munan, parti politik enda tau ngena chara pejal tauka ngenakutka rayat laban tu mega tau bendar ngujungka rayat lebih agi bala TR enda tepansutka penemu enggau peminta rayat ketegal takut.
“Anang ngaga bala TR tauka Tuai Raban Bansa nyadi orang ke takut mantaika penemu sereta pekara ti endang amat.
“Rayat nengeri Sarawak ka meda orang ke megai menua ngena polisi ke manah, ukai ngena chara ti ngenakutka orang,” pia ku iya.