100 iku ketuai komuniti ba Sri Aman udah ngulu Program Randau Begulai enggau JBALB

SRI AMAN: Sepenyampau 100 iku ketuai raban bansa ari kandang menua Pelilih Sri Aman ngulu Program Randau Begulai enggau Opis Bekal Ai Menua Pesisir (JBALB) Bagi Menua Sri Aman diatur Serakup Ketuai Komuniti China, bepalan ba Bilik Mayuh Guna, Balai Suaraj Sri Aman, semak ditu pagi kemari.

Chairman serakup nya, Pemancha Lee Siang Hua madahka tuju program nya diatur dikena ngulihka timbal ari raban JBALB bekaul enggau penanggul bekal ai tejanggal ti suah nyadi ba beberapa endur kandang diatu.

Ku iya, asil ari randau nya, bala ketuai komuniti ulih bekunsika penerang enggau nembiak redak dipegai sida pasal penanggul bekal ai tejanggal ti ditapi sida.

Pia mega ku iya, sekeda endur suah napi penanggul bekal ai enda deras nyengkaum ba sitak Entulang, Brayun, Sri Jaya.

“Pia mega ba Munggu Sabun, Kampung Muhubbah, Stumbin, Seduku, Pasar Sri Aman, Sabu enggau Temudok ti suah napi bekal ai tejanggal enggau ai enda deras,” ku iya nerang.

Nangkan nya, penerang ari raban JBALB Sri Aman senentang perambu opis nya mutarka penanggul ulih dikunsi begulai bala komuniti bukai.

“Kitai pechaya, perintah nengeri bisi perambu dikena mantu peranak Sri Aman mutarka penanggul bekal ai tejanggal ti suah nyadi ditu,” ku iya.

Sama datai, Menteri Muda Pengelantang Komuniti Sarawak ti mega Kaban Kunsil Nengeri (ADUN) Simanggang, Datuk Francis Harden Hollis sereta bala ketuai opis perintah bukai.

Program randau mega digulu bala ketuai komuniti ari komuniti Melayu enggau Iban kelimpah China.