Laban tusun penuduk dalam bilik kelas nya ulih mantu nempa nembiak ti landik nengkebang enggau bepikir: Manyin
KUCHING: Model tusun penuduk dalam bilik kelas Abad Ke-21 ti deka dikemeranka Sarawak taun baru, disadang ulih mantu nempa nembiak ti landik nengkebang enggau bepikir.
Kebuah kitai deka neladan sereta bejalaika tu laban deka nempa nembiak nyadi orang ti landik nengkebang sereta bisi pengelandik bepikir, nya kebuah kitai enda ulih agi ngena tusun penuduk dalam kelas ke diatu.
Menteri Pelajar, Sains enggau Pansik Teknologi, Dato Sri Michael Manyin Jawong madah, berindik ari nya Sarawak deka neladan tusun penuduk nembiak dalam bilik kelas Abad Ke-21 ke bisi dikemeranka sekula di menua tasik baka di menua Finland, Beijing sereta Singapura ke udah dulu ngena model nya.
“Kitai udah ngelawa menua Finland sereta Beijing, lalu ba Beijing nyau semua ngena chara baru iya nya tusun penuduk nembiak dalam bilik kelas Abad Ke-21 tang ba kitai pekara tu ukai mudah, nya alai enggau serunyut kitai nitihka sida.
“Kitai deka nunda tusun penuduk dalam bilik kelas abad Ke-21 berengkah taun baru. Model tu deka berengkah dipejalaika dulu dalam siti kelas ba tetiap bagi menua di nengeri tu.
“Kebuah kitai deka neladan sereta bejalaika tu laban deka nempa nembiak nyadi orang ti landik nengkebang sereta bisi pengelandik bepikir, nya kebuah kitai enda ulih agi ngena tusun penuduk dalam kelas ke diatu,” ku iya lebuh dikerandau raban pengarang berita bekaul enggau model baru nya.
Dulu ari nya iya nyilih Kepala Menteri Datuk Patinggi Abang Johari Tun Openg bejadi International Conference on Education Transformation 2018 (i-CET 2018) ke diatur ba sebuah hotel ditu,kemari.
Nitih ku iya, sekula ke dipilih endur ngepunka model nya, iya nya ba sekula ke ulih dilawa laban sekula bukai deka ngelawa sereta meda gaya model tu lalu nundaka nya ba sekula diri udah nya.
Opis menteri iya ku Manyin, amat ngarapka model nya ulih dipejalaikan laban nya ulih meransang pengelandik nengkebang enggau bepikir, lalu ukai baka ke diatu ti mandangka pengajar baka ti nyadi ‘bos’.
“Nya alai tusun penuduk nembiak dalam bilik kelas abad Ke-21 deka ditusun sekalika entara empat ngagai lima tauka enam iku dalam siti kluster, tang dikena ngemujurka tu kitai begunaka mayuh belanja laban kerusi enggau meja ditukar kelimpah ari disikap ngena gajet baka komputer enggau ke bukai.
“Aku udah berandau enggau direktor IPGK Batu Lintang, iya madah sida bisi endur ke ulih alai kitai ngepunka bilik kelas ti baka tu (bilik kelas Abad Ke-21). Kitai deka ngabas lalu sekula bukai tau datai ngelawa IPG sereta meda bilik kelas tu.
“Lebuh kluster tu dipejalaika ila dia pengajar ukai agi baka ‘bos’ tang fasilitator,” ku iya seraya madahka mija nya deka ditusun baka segi tiga.
Ditanya sekalika model baru nya deka dibai ngagai kabinet, Manyin madahka kebendar nengeri tu udah dipinta ngiga chara tauka model baru ke ulih dikemeranka.
“Enda ibuh dibai (ngagai kabinet), kitai ulih ngereja kediri empu.
“Kebendar perintah ke sebedau tu iya nya Barisan Nasional (BN), ba aum kepenudi ti digulu aku dalam bulan April taun tu, kitai (nengeri) dipinta ambis nadai bisi siti model sekula.
“Tang diatu ukai agi BN, nya alai tu ukai pekara baru laban perintah BN sebedau tu, iya nya Menteri (Opis Menteri Pelajar Malaysia) udah minta kitai ngereja tu kebendar iya,” ku iya.
Kelimpah ari nya lebuh ke bejaku maya bejadika aum besai nya (i-CET 2018), Manyin arap bendar semua pengari ulih bekunsi penemu enggau chara baru dikena ngangkatka sistem pelajar menua.
“i-CET ti keterubah tu senipak amat diatur diatu laban pengari ulih besilih penemu enggau chara ngajar ke baru lebih agi ngena teknologi dikena nuju industri 4.0 ulih nempa nembiak ti landik nengkebang enggau bepikir,” ku iya.
Berebak enggau tu perintah nengeri ngagihka belanja sepenyampau RM200,000 ngagai Alumni IPGK Batu Lintang.
Sama bisi datai ba pengerami nya kemari, Sekretari Mendam Opis Menteri Pelajar, Sains enggau Pansik Teknologi Datu Sudarsono Osman sereta Chairman Serakup Alumni IPGK Batu Lintang,Dr Rosana Awang Bolhassan enggau ke bukai.
Dato Sri Michael Manyin Jawong Menteri Pelajar, Sains enggau Pansik Teknologi