Apai indai meseti berani ngaga ripot nyema bisi kes penyalah bekaul nembiak mit ti nyadi dalam ruang bilik sida
SRI AMAN: Komuniti bisi tanggungpengawa besai mantu perintah nyaga nembiak mit ari dijamah ngambika sida tu diau likun sereta begulai enggau raban ti ulih dikeandal.
Menteri Muda Pengelantang Komuniti Sarawak, Datuk Francis Harden Hollis madahka tetiap ruang bilik patut sedar kes penyalah seksual nembiak kebendar suah agi nyadi ari peragam mensia mayuh.
“Kitai patut ngajar bala anak berani bejaku enggau madah enti bisi orang deka ngachau enggau nguji ngereja ulah enda manah ngagai sida.
“Apai indai mega menggi tanggungpengawa ngaga ripot enti bisi kes baka tu nyadi ba ruang bilik sida tauka dalam komuniti kitai kemaya hari,” ku iya.
Harden ti mega Kaban Kunsil Neneri ( ADUN) Simanggang mansutka jaku nya lebuh bejadika Pengawa Nutup Bengkel Pengelikun Diri Nembiak Mit Ungkup Kepala Pengajar Sekula Primari bepalan ba Hotel Seri Simanggang, Sri Aman semak ditu, kemari.
Ku iya, suah agi orang ti ngereja penyalah mar dikelala, kebuah pia sida tu tau ngembuan ulah orang dipe- basa tauka kemerah.
“Chara pemadu manah iya nya ngajar bala anak ngelala orang besai tuai ti nguji nyamah sida tauka nemu ba dini tauka ngagai sapa sida patut minta bantu,” ku iya madah nyemetak.
Lebih 200 pengajar datai ari 50 buah sekula di baruh pegai Opis Pelajar Pelilih Sri Aman enggau Betong udah ngulu bengkel pengelama tiga minggu di Bagi Menua Sri Aman nya.
Pia mega ku iya, nyadi raban pengajar, sida patut bejalaika pangku pengawa besai amat.
“Semua kita tau nyeridi bala anak mit ari renggat tumu, ngelala bida gaya ulah ti patut enggau enda,” ku iya.
Nya alai, bala nembiak patut diajar baka ni sida tau ngerarika diri tauka nyeliahka diri ari orang ngereja ulah baka nya,” ku iya nandu.
Batang tuju bengkel bekunsi enggau semua raban komuniti pasal pekara bekaul enggau meri awak ngagai sida nempa penemu pasal penderaan seksual nembiak mit.
Sama datai Pemesai Ngatur Pengawa Sarawak ari Opis Residen Bagi Menua Sri Aman, Thomas Kendawang enggau Pemesai Ngatur Pengawa Sarawak ari Opis Pelilih Sri Aman, Azmi Morshidi.
Apai indai mega menggi tanggungpengawa ngaga ripot enti bisi kes baka tu nyadi ba ruang bilik sida tauka dalam komuniti kitai kemaya hari. Datuk Francis Harden Hollis Menteri Muda Pengelantang Komuniti Sarawak