Asil minyak, gis patut dibagi bela enggau peranak Sarawak, ku Leonard
MUKAH: Parti Keadilan Rakyat (PKR) Mukah setujuka penemu ex-Ketuai Kanan Tan Sri Leonard Linggi, asil ari minyak enggau gis patut dibagi bela ngagai peranak Sarawak.
Sapit ketuai PKR Mukah Abdul Jalil Bujang madah, udah nyadi hak ekslusif ti enda patut semina diasaika sekeda raban aja baka sebedau tu.
“Pekara ti disebut Tan Sri tentu mega bisi pengamat laban iya antara ketuai ti kala megai pengawa ba perintah Nengeri Sarawak sebedau tu,” ku iya ba sebengkah penerang.
Leonard mansutka jaku nya ba sebengkah forum ba Kuala Lumpur bekaul enggau Konstitusyen Perintah Besai enggau Sempekat Malaysia 1963 (MA63) apin lama ke udah.
Nitih ku iya, iya mega enggaika perintah nengeri di baruh pegai perintah Gabungan Parti Sarawak ( GPS) ngena asil minyak enggau gis nadai beratika pemerat enggau peminta peranak.
Abdul Jalil beambika chunto Jematan S, Fountain Berirama enggau Masjid Terapung ti udah nelan belanja lebih RM70 juta ba Kuching, tang rayat beguna amatka bekal ai, sambung jalai alun ti menyana enggau bekal kuasa karan ti meruan agi.
Ngelansa pasal gaya politik baru, iya mega meri terima kasih ngagai rayat ti udah gawa nyilih perintah besai ngagai Pakatan Harapan (PH).
“PH udah nyendiaka awak besai ungkup rayat mantaika peminta,” ku iya.
Pia mega, bala pengari rayat berani mantaika sebana rayat enggau penimpang perintah.
Pekara tu diperati siti pengawa ti manah ke alai kuasa ba jari rayat, ngubah enggau nukar pengari rayat ti enda kompeten pulaika pemansang enggau pengelurus.