Perintah udah ngagihka RM35 juta ungkup elawin KM, KK ba taun 2019
KUCHING: Agih belanja RM35 juta ari perintah besai ti dipadahka dikena mayar elawin bala ketuai raban bansa di Sarawak ungkup taun 2019, disambut manah.
Chairman Serakup Ketuai Komuniti enggau Tuai Rumah Kaum Iban (PEMAIK) Bagi Menua Kuching, Penghulu Gunting Hiang madahka, manah agi enti ungkup belanja diberi ngagai Ketuai Komuniti (KM) enggau Ketuai Kaum (KK).
“Enti nya (RM35 juta ungkup Sarawak ba taun 2019) kena mayar elawin bala ketuai komuniti enggau ketuai kaum nya amat chukup manah.
“Kitai ditu enda sama, laban sebedau tu bala ketuai komuniti iya nya penghulu, pemancha enggau temenggung (elawin) dibayar ulih perintah nengeri, lalu ketuai kaum baka ketuai genturung pendiau enggau tuai rumah (elawin) dibayar ulih perintah besai.
“Nya alai enti ulih anang bepilih, ungkupka semua (ketuai komuniti enggau ketua kaum). Lalu enti nundaka ( perintah besai) anang ngetuka mayar elawin nya ba nengeri tu,” ku iya lebuh ditelefon Utusan Borneo, kemari.
Ngenang pasal RM35 juta ke semina dikena mayar elawin sida ke dipilih peranak genturung pendiau enggau rumah panjai, iya madahka;
“Baka ni sida deka nemu sekalika nya dichirika ari parti politik tauka dipilih peranak genturung pendiau enggau rumah panjai?,”ku iya.
Apin lama, Menteri Kerja Raya Baru Bian madahka perintah besai Pakatan Harapan deka ngungkupka belanja RM35 juta ngagai Sarawak dikena mayar elawin ketuai raban bansa ungkup taun 2019.
Lalu Baru madahka ungkup belanja nya semina dikana mayar elawin ketuai raban bansa ke dipilih rayat ukai ke dipilih ketegal pekara politik.
Kelimpah ari nya, Tuai Rumah ( Tr) GP Boulder Built Tr Spencer Birai lebuh dipinta ngenang pekara ti sama madahka perintah besai PH ti ngungkupka RM35 juta nya ngagai ketuai genturung pendiau tauka tuai rumah endang pekara ti manah.
“Nya pekara ti manah dikena ngelempungka tating belanja perintah nengeri Sarawak ke berengkah mayar elawin (ketuai genturung pendiau tauka tuai rumah) berengkah ari bulan Mei 2018.
“Ari aku empu, aku beterima kasih ngagai perintah nengeri ti mayar elawin ngagai tuai rumah, ketuai genturung pendiau berengkah ari bulan Mei 2018, lalu pia mega terima kasih ngagai perintah besai PH laban deka neruska ba taun 2019,” ku Spencer.