Nya deka mai ubah ngagai sektor betanam betupi nengeri ti nyadi pemun penegap pemansang ekonomi
KUCHING: Sarawak ngemeranka beberapa strategi dikena ngenegap sereta ngemajuka agi sektor betanam betupi nengeri tu ke lalu ulih nyungkak ekonomi nengeri.
Kepala Menteri, Datuk Patinggi Abang Johari Tun Openg meri puji ngagai Opis Menteri Betanam Betupi Moden, Tanah Adat enggau Pemansang Kandang Menua ti betuaika Datuk Amar Douglas Uggah Embas, ti bisi ‘input’ baru ke ulih mai transformasyen sektor betanam betupi nengeri ke nyadi pemun pemansang ekonomi ti tegap agi.
“Sehari tu (kemari) aku deka bekunsi enam pekara ti aku anggap nyadi siti chara strategik kitai nukar anggap ngereja pengawa betanam betupi nya pengawa nyambil lalu dipejalaika nengah chara mit, nanam dibelakang rumah aja.
“Diatu kitai deka nukar sektor betanam betupi nyadi sebengkah sektor ekonomi ti bisi chara korporat baka barang mata ke diproses dulu lalu nyadi produk ke bisi rega tinggi sereta dipasukka ngagai makit.
“Nya kebuah Uggah ke nyadi menteri megai tanggung pengawa dekaka Kompeni Besai sereta bisi vendor ke endur orang betanam betupi kitai nyual asil laban kompeni tu bisi kaul enggau makit luar,” ku iya seraya madahka nya entara chara baru dikena bejalai sereta ngemansangka sektor betanam betupi nengeri.
Abang Johari mansutka pekara nya lebuh bejadika Sarawak AgroFest 2018 ti diatur perintah nengeri nengah Opis Menteri Betanam Betupi Moden, Tanah Adat enggau Pemansang Kandang Menua, Opis Betanam Betupi enggau Opis Servis Veterinar Sarawak sereta disukung ejensi bukai ba Penview Convention Centre (PCC), De- mak ditu, kemari.
Strategi kedua ku Abang Johari, Sarawak deka numbuh tauka nempa orang dagang betanam betupi ngena chara baru iya nya patut bisi chara tauka strategi dagang.
Dulu suba engka nadai pemandai ku iya, tang diatu orang betanam betupi Sarawak bisi anak ke bepelajar tinggi ke ulih dilatih nyadi orang dagang betanam betupi moden ke lalu ulih nyadika sektor betanam betupi nengeri lebih moden.
Strategi ketiga, perintah nengeri udah ngungkup sereta meri belanja dikena numbuhka Palan Ngumpul, Proses enggau Mungkus (CPPC) endur ngumpul asil betanam betupi ke diasilka orang betanam betupi Sarawak awakka ulih dijual ngagai menua luar, ku iya.
Nitih ku Abang Johari palan ngumpul asil betanam betupi nya dibuka tauka ditumbuhka ba Samarahan, Limbang, Betong enggau kandang menua ulu.
“Lebuh bisi palan pengumpul tu, ditu mih asil kebun orang batanam betupi kitai digumpul awakka ulih dijual ke menua luar.
“Ungkup belanja udah diberi dikena ngemansangka palan pengumpul tu semina ngereja aja agi, ke dikenangika aku nadai barang tauka asil digumpul ba palan tu, nya alai kitai enda tau enda bisi pemekal asil betanam betupi awakka bisi dijual ke menua luar.
“Kitai ngena teknologi ‘Apps’ ke alai nengah Apps kitai madahka rega barang, nama produk enggau ke bukai, enti kitai ngena teknologi baka enggau tekala nya kitai bisi pemeli,” ku iya.
Bejaku baru, Abang Johari madahka perintah nengeri deka nyendiaka infrastruktur iya nya bekal ai enggau bekal kuasa karan di menua pesisir ti ulih mantu ngemajuka sektor betanam betupi nengeri.
Perintah nengeri udah ngungkupka RM2.8 billion ungkup timpuh dua taun dikena nyambung bekal ai menua pesisir enggau RM2.3 billion diagih ngagai SEB dikena nyambung bekal kuasa karan menua pesisir, ku iya seraya madahka nya strategik transformasyen sektor nya di menua pesisir.
Chara kelima dikena perintah nengeri ngangkat, ngemaju sereta mai transformasyen ba sektor betanam betupi, iya nya ngubah orang betanam betupi nyadi orang dagang betanam betupi ke ulih ngelanggur enggau ngatur ladang tauka kebun ngena chara dagang.
“Perintah nengeri udah ngemendarka RM200 juta ungkup modal ‘Venture Capital’ dikena bejalaika produk baru ngambika ulih nempa orang dagang betanam betupi, tu pekara kelima diputuska kitai dikena mai transformasyen ngagai menua pesisir kitai nengah sektor betanam betupi,” ku iya.
Kelimpah ari nya, Abang Johari mega madahka perintah nengeri meri bantu ngagai Pertubuhan Peladang Kawasan (PPK) ke alai sebedau tu tetiap PPK nerima ungkup belanja RM24,000 tang berengkah taun baru diungkupka RM95,000.
Sama bisi datai ngagai pengerami nya kemari, Uggah ti mega Sapit Kepala Menteri enggau bini iya Datin Amar Doreen Mayang; Menteri Muda Pemansang Tanah Adat Datuk Roland Sagah; Menteri Muda Betanam Betupi Dr Abdul Rahman Ismail; Menteri Muda ba Opis Kepala Menteri (Pekara Korporat) Abdullah Saidol enggau ke bukai.