Sarawak AgroFest deka diatur ninting taun
KUCHING: Sarawak AgroFest deka diatur ninting taun sereta dipejalaika begintir endur di serata nengeri tu.
Kepala Menteri, Datuk Patinggi Abang Johari Tun Openg madahka, nya sebengkah ari chara dikena ngenegap sereta ngamajuka sektor betanam betupi nengeri ke lalu ulih nyungkak ekonomi Sarawak.
Iya madahka program AgroFest nya ulih dikena meri penyedar ngagai mensia mayuh pasal sektor betanam betupi.
“AgroFest tu tau diatur ninting taun, engka tau diatur baka ba Kuching, Bintulu, Miri, Betong enggau endur bukai awakka peranak menua pesisir nemu sereta ulih meretika nama ti dipejalaika perintah tauka kitai Gabungan Parti Sarawak (GPS), “ku iya.
Abang Johari mansutka pekara nya lebuh ti bejadika Sarawak AgroFest 2018 ti diatur perintah Sarawak nengah Opis Menteri Betanam Betupi Moden, Tanah Adat enggau Pemansang Kandang Menua, Opis Betanam Betupi Sarawak sereta Opis Servis Veteriner sereta disukung sekeda ejensi ba Penview Convention Centre (PCC), Demak, ditu kemari.
Program AgroFest 2018 ke dipejalaika ba PCC, Demak diatur berengkah 20 ngagai 28 Oktober tu, dibuka ngagai mensia mayuh.
Dulu ari nya, Sapit Kepala Menteri Datuk Amar Douglas Uggah Embas meri perambu kebuah AgroFest patut diatur ninting taun laban nerima timbal ti manah ari orang dagang betanam betupi.
Uggah ti mega Menteri Betan Betupi Moden, Tanah Adat enggau Pemansang Kandang Menua, madahka program AgroFest nya siti ari aktiviti pelajar, pekit enggau pemerindang, aum besai sereta pengawa pemandang enggau bejual bekaul enggau sektor betanam betupi.
“Baka ke dipadahka Datu Ik Pahon (Sekretari Mendam Opis Menteri Betanam Betupi Moden, Tanah Adat enggau Pemansang Kandang Menua), asil ari pengawa bejual dalam timpuh lima hari ke udah, manggai RM500,000, ninting hari bisi RM100,000 lalu kitai arap bendar ba beberapa hari agi, kitai deka bulih mayuh agi.
“Bepelasarka timbal baka ni kitai ulih narit pengemeran teknologi, orang betanam betupi, kitai meri perambu ngagai YAB Kepala Menteri ngambika program tu (AgroFest) diatur ninting taun.
“Ari tu kitai ulih meda pemansang sektor betanam betupi ke lalu ulih nuju ngagai sektor betanam betupi digital,” ku Uggah dalam jaku pengelalu pengerami nya.
Program Sarawak AgroFest 2018, iya nya pengerami betanam betupi ti besai di Sarawak ti mungkur pengawa pemandang enggau bejual, aum besai enggau seminar, ngenipakka pengawa dagang, bejual barang pemakai; mandangka zoo mit; lumba enggau main, pekit enggau panggau pemerindang.
Sarawak AgroFes,t iya nya nama baru dikena nganti nama Hari Peladang, Penternak dan Nelayan (HPPN) lalu tuju dikena ngelakuka industri betanam betupi enggau bepelasarka agro.
Tuju Sarawak AgroFest diatur mega ngambika Sarawak sebuah hub betanam betupi di rantau tu enggau objektif ngelakuka asil betanam betupi Sarawak sereta produk bepelasarka agro, kelimpah ari nyendiaka peluang dagang enggau beranakka puku sereta meransang penyereta raban biak dalam sektor betanam betupi.
Entara program ke bisi diatur sehari tu (26 Oktober) nyentuk 28 Oktober baka pekit manduk ikan sungai, pekit manduk empuyak; Ratu AgroFest; panggau pemerindang -Ricky El; Agro Zumba & Pekit Poco-Poco Kreatif; promosi ngelelong produk betanam betupi enggau ke bukai kelimpah ari pengawa ngelaku Sarawak AgroFest.