Wang turu bantu anak mit ulih nyadi puku bedagang Tu ulih nyadika puku ngagai penerima ngepunka pengawa dagang maya sida udah manggau umur 18 taun
MIRI: Bantu wang ungkup anak mit di Sarawak ke berengkah taun baru, ulih nyadika puku ngagai penerima ngepunka pengawa dagang maya sida udah manggau umur 18 taun.
Menteri Pengintu Pendiau, Pengelantang Komumiti, Orang Indu, Ruang Bilik enggau Pemansang Anak Mit Dato Sri Fatimah Abdullah madah, kelimpah ke tuju pelajar, pemeri ari perintah nengeri nya dikena meransang raban nembiak masuk bidang pengawa dagang.
“Tu endang sebengkah ari chara perintah dikena nentuka dudi hari ila genap iku anak Sarawak ke ada, maya udah manggai umur 18 taun, nya (duit simpan) ulih dikena sekalika dikena nam- pung pelajar ngagai kolej, universiti tauka pilih dikena masuk pengawa dagang.
Nya (duit simpan) mega ulih dikena nyadi pusin (pukul) geran sida,” ku iya maya ngintu pengerami Hari Orang Indu Renggat Pelilih Subis di Bekenu kemari.
Fatimah andal inisiatif baru nya deka meri pangka besai ngagai penatai pemisi lebih agi dikena nyungkak ekonomi nengeri tu.
Kepala Menteri Sarawak Datuk Patinggi Abang Johari Tun Openg deka mantaika atur nya maya Aum Kunsil Nengeri ( DUN) kena 5 November.
Pekara nya bisi dipansutka Abang Jo rambau pengerami Lan Berambeh Anak Sarawak di Kuala Lumpur ba minggu siti ke udah.
“Nadai orang bukai ke lebih siru ngagai pendiau pengidup kitai kelimpah ari kitai empu,” ku iya.
Fatimah ngasaika bantu nya endang tinjau jauh Abang Jo dikena ngemansangka pengereja pengawa ari raban anak Sarawak.
Bantu nya deka diberi ngagai semua anak mit ke ada ba Sarawak bepun taun baru enda ngira ari ni penatai enggau penyampau penatai pemisi apai indai. Wang turu nya ulih dambi pengudah penerima manggai umur 18 taun.
Ngelasa silik pasal , Fatimah madah penyampau pengada ba nengeri tu bepun ari Januari nyentuk september taun tu 23,000 iku.
Taja pia, penyampau nya agi mimit enti dibanding enggau taun 2016 iya nya 32,473 iku lalu 2017 bisi 32, 709 iku.
“Kitai ngarap taun baru, deka mayuh agi anak Sarawak ada. Genap iku deka nerima bantu ari perintah. Atur iya, asal pengada nya udah berejister,” ku iya.
Nya alai, opis menteri iya deka bekeresama enggau Opis Pengerai enggau Opis Pengerejister Menua dikena ngerembaika penerang pasal bantu tu.
Sama bisi datai Menteri Muda Orang Indu , Ruang Bilik enggau Pemansang Anak Mit ke mega ADUN Bekenu Rosey Yunus, Pemesai Pelilih Subis Subis Jamalie Busri, Direktor Kaunsil Genturung enggau Pamansang Ruang Bilik Menua (LPPKN) Sarawak Dennis Chai enggau Pemesai Perubat Klinik Bekenu Dr Shattish Sivarimuthu.
Dato Sri Fatimah Abdullah Menteri Pengintu Pendiau, Pengelantang Komumiti, Orang Indu, Ruang Bilik enggau Pemansang Anak Mit