Najib enggau Irwan Serigar dikemendar dijamin RM1 juta

KUALA LUMPUR: ExMenteri Besai Datuk Seri Najib Tun Razak enggau ex- Ketuai Sekretari Perbendaharaan Tan Sri Dr Mohd Irwan Serigar Abdullah ti ngaku enda salah ba enam tuduh salah guna wang dipenggi perintah Malaysia penyampau RM6,636,065,000, bela dikemendar diikat jamin RM1 juta nengah dua penjamin enggau Kort Sesyen ditu.

Akim Azman Ahmad bela ngemendarka Najib enggau Mohd Irwan Serigar mayar jamin urung RM500,000 kemari lalu laluh iya dibayar dalam timpuh 10 hari bepun sehari tu.

“Seduai iya bela dipinta nyuaka pasport antarabansa enggau diplomatik, nyema bisi ngagai kort nyentuk kes tembu lalu seduai mega ditagang ngachau saksi piak pendawa rayat maya kes bejalai,” ku iya.

Iya mega netapka 29 Nov endur kes nya dibicharaka baru.

Dulu ari nya, ex- Akim Kort Federal Datuk Seri Gopal Sri Ram, dipadu nyadi sapit pendawa rayat kanan ngelanggur jamin RM3 juta ngagai kededua tetuduh.

Luyar besai ngarika Najib, Tan Sri Muhammad Shafee Abdullah minta penyampau jamin RM4.5 juta ke udah dibayar Najib dalam kes sebedau tu dikena baru ba kes tu.

Muhammad Shafee madah Najib sebedau tu dilepas nengah jamin RM4.5 juta ungkup 32 tuduh lalu nyadi penyampau ke pemadu manah dalam sejarah Malaysia.

“Aku mega deka nyemetak madah siti pekara iya nya patut diperati ba renggat dunya ungkup kes bukai laban tu endang siti ari kes siku orang ke napi tuduh ari sekeda kort lalu jamin mega bisi ditetap ba sekeda kort.

“Orang ke diarika aku nadai niat deka ninggalka menua ty laban iya deka meresi nama iya enggau sida sebilik.

“Orang diarika aku nya bisi kaul enggau dunya politik lalu iya kala nyadi Menteri BesaiPahang, Sapit Menteri Besai, Menteri besai lalu diatu iya agi gawa nyadi Kaban Parlimen Pekan,” ku iya.

Sri Ram, taja pia madah peminta Muhammad Shafee ngemendarka Najib dilepas ngena penyamapau jamin sebedau tu, madahka penyalah digaga iya chukup berat. — Bernama