PIPJ nampung pengawa meri penemu ICT ngagai rayat pesisir
SARIKEI: Palan Internet Jakar (PIPJ) nampung pengawa sida meri penerang enggau penemu teknologi pemadah enggau penyambung (ICT) ngagai peranak menua pesisir.
Sebedau tu dikelala enggau nama Palan Internet 1Malaysia, PIPJ deka ngelangkar program ti ngemai tuju ngelakuka servis bekaul enggau penyikap perengka guna ungkup mensia mayuh, ku chairman iya, Tuai Rumah Setia Unggok.
“Kitai deka nampung pen- gawa bejalai ngabas rumah panjai ba kandang menua tu dikena nerang ngagai peranak dia pasal pemisi perengka guna ICT ba palan tu sereta mega servis pelajar baka kus ICT bisi disedia ungkup mensia mayuh,” ku Setia lebuh nguluka bala kaban komiti bejalai ngabas Rumah Naning ba Sungai Baji, Meruton semak ditu, apin lama ke udah.
Sida sebuat bejalaika pengawa perintah nengeri ti ngemeratka ekonomi digital nyadi chara ngerumban nengeri enggau peranak iya maju sereta lantang, ku iya nerang.
Nengah program nya, sida meri penerang mayuh bengkah pekara ari inisiatif ekonomi digital nengeri baka e-wallet/Sarawak Pay enggau Sarawak Multimedia Authority (SMA), ku iya, seraya nambah, sida mega ngelakuka slogan ‘Click Dengan Bijak’ nyadi siti lalau tauka ngingatka mensia mayuh kelebih agi rebak nembiak ngenyauhka diri ari salah guna servis tauka perengka guna ICT.
Iya ngarapka rebak nembiak kelebih agi sida ti lepas sekula deka ngena memanah perengka guna enggau servis ba palan nya, minta kereja nengah online tauka belajar baka ni chara dagang online.
Antara sida ti nyereta pejalai nya Chairman PIPJ Penghulu Tuba Kasa, Sapit Chairman Penghulu Bidai Ginsang, Sekretari Tuai rumah Rambai Bandang, Pengatur Pengawa Shilla Usan enggau Penulung Pengatur Pengawa Liwati Limbang.