Dua menyadi tesat, pulai ngabas panjuk

BINTULU: Pejalai dua iku diri menyadi deka pansut ari babas tejanggal pengudah seduai iya bela tesat enda tetemuka jalai pansut pengudah ngabas panjuk ba sebenkah endur di Kemena enda jauh ari Palan Belajar Deriba Budiman lemai ensana.

Urung lima setengah jam tesat ba babas nya, pengujung iya seduai tetemuka jalai pansut kediri empu nengah bantu raban bomba ti datai nyaup ngiga seduai iya malam nya.

Ketuai Balai Bomba enggau Penyah Penusah (BBP) Bintulu ke mega komander operasyen, TPgB Mohamad Meramit madah, piak sida nerima ripot penusah nya urung pukul 6.41 lemai lalu terus nganjung tim Operasyen Nyidi enggau Nyelamat (SAR) orang lenyau nitihka tusui orang di menua nya.

Ku iya, orang ke tesat Albert Ngo, 22, enggau Govinda Ngo, 27, enda tetemuka jalai pulai dalam babas nya pengudah pulai ngabas panjuk urung pukul 3.30 lemai. Udah nya madah madah ngagai menyadi tuai sida ngambika minta sah raban SAR ngagai kandang endur ke lenyau nya.

“Seduai iya bela mujur mansutka diri urung pukul 7 malam begulai enggau raban bomba ke mega tama ngagai babas nya nyidi seduai ke lenyau,” ku iya.

Pengudah mujur mansutka diri ari babas nya, ku iya operasi SAR diketu urung pukul 9.15 malam lalu operasyen nya udah bejalaika sebuah kereban FRT nengah saup enam kaban betuaika PBK II Pero Guyuh, sebuah kerita pikap (4WD) ditepan tiga bomba enggau tiga iku polis.