Uggah: Semua tuai rumah panjai endang dipilih nembiak redak

KUCHING: Semua tuai rumah panjai endang dipilih nembiak redak dipegai sida, ku Sapit Kepala Menteri Datuk Amar Douglas Uggah Embas.

“Nadai pengawa baka selama dikena nyiri tuai rumah ba jeman moden tu ke nampung pengawa ari apai ngagai anak tauka dipilih raban bekuasa ke bisi. Kemaya hari, orang indu mega ulih dipilih nyadi tuai rumah,” ku iya madah ngagai The Borneo Post ensanus.

Semina bala ketuai komuniti baka Temenggong, Pemancha enggau Penghulu aja dichiri perintah Sarawak lalu sida tu dibayar gaji enggau diberi opis ti meruan, ku iya.

Baka ti ditemu komuniti Iban ku Uggah, peranak rumah panjai deka milih ketuai sida lalu patut bisi siti konsensus baka ni chara ngatur pekara nya.

Bisi maya sida deka ngena kelai jari enti dipesetuju nembiak redak, ku iya nam- bah.

Pengudah tuai rumah dipilih, sekretari Komiti Pemansang enggau Pengelikun Genturung Pendiau (JKKK) deka nganjung nama sida ngagai opis pelilih menua, ku iya lalu tuai rumah ti dipilih tu deka dibayar elawin.

Lebuh ditanya sekalika iya meretika jaku Menteri Kereja Raya, Baru Bian, ti madahka semina tuai rumah ke dipilih nengah chara demokratik aja dibayar 70 peratus ari semua elawin ti diagih perintah besai Pakatan Harapan, ku Uggah, iya agi saru.

Taja pia, Baru patut ngulihka penerang ari Opis Pelili menuah, sapa bagi ti dilipilih nyadi Tuai Rumah, ku Uggah.

“Taja pia perintah Sarawak ti mayar elawin tuai rumah,” ku iya, seraya madahka udah bisi surat tesau dikeluarka dalam bulan Mei 2018 ti mandangka perintah Sarawak deka mayar elawin tuai rumah.

Elawin terus dibayar perintah nengeri pengudah perintah besai PH ngeluarka surat tesau nginsil nya dalam bulan Mei 2018.

Ba penerang berita ensanus, Baru madahka semina bala ketuai komuniti ke dipilih nengah chara demokratik aja ulih nerima gari ari perintah besai berengkah ari taun baru.

“Semina Tuai Rumah tauka ketuai komuniti dipilih chara demokratik aja deka nerima 70 peratus bagi ari gaji sida ari perintah PH.”

Baru mega madahka Perintah Besai udah ngagihka belanja dikena mayar elawin enggau gaji ngagai semua bala ketuai komuniti di serata Malaysia nengah Opis Menteri Pemansang Menua Pesisir.

Di Sarawak, semua penyampau belanja diagih maya dipansut, manggai urung 70 peratus ari gaji tetiap iku ketuai komuniti, ku iya.

“Ba taun baru, perintah besai PH udah setuju deka nampung pengawa nya ngagai Sarawak taja pan enda ari baruh pegai perintah nengeri PH. RM35 juta udah di ungkup ke tuju pengawa tu lalu deka dibantai dalam Bajet 2019 ti deka datai.”

“Taja pia, perintah PH nyemetak madahka saup belanja ari perintah besai PH ke diungkup ngagai perintah GPS semina ulih dibayar perintah GPS Sarawak ngagai bala ketuai komuniti ti dipilih nengah chara demokratik ari peranak rumah panjai tauka genturung pendiau aja,” ku Baru madah nyemetak.

“Diatu bala ketuai komuniti baka tuai rumah tauka ketuai genturung pendiau ti enda dipilih bala nembiak redak rumah panjai nengah chara dimokratik, tang dipilih seraban orang nengah chara politik ari kaban politik enggau bala YB GPS, melakangka peneka peranak rumah panjai, deka enda nerima bagi 70 peratus ari agih belanja perintah besai PH.