GPS nemu pekara ti manah ungkup rayat Sarawak
LONG LAMA: Parti politik dalam Gabungan Parti Sarawak (GPS) nemu nama ti manah ungkup rayat di nengeri tu.
Menteri Muda Jalai Tebing Pantai Datuk Julaihi Narawi madah, GPS deka nentuka semaya ti digaga terus dipejalai sereta dikemansng nitihka peminta rayat.
“Kitai nemu nama ti pemadu manah lalu nemu guna rayat. Kitai deka neruska projek ke udah disemaya,” ku iya nerang.
Iya madah munyi nya lebuh ngabas projek jematan Long Lama ti penyauh 140 km ari mengeri Miri, kemari.
Julaihi ke mega Mandal Presiden Parti Pesaka Bumiputera Bersatu (PBB) madah, semaya ke mega nyengkaum projek ke udah dipadah dalam kimpin maya pengawa bepilih seruran dikemata ngambika mujur dipejalai sereta tembu enggau manah.
Iya nambah, mayuh agi projek baru deka dilangkar perintah nengeri ungkup rayat.
Bejaku bekaul projek jematan Long Lama, projek perintah nengeri nya udah ngena ungkus RM67 juta. Jematan nya dijangka deka dibuka ungkup mensia mayuh kena bulan April taun nyin ila.
GPS sebedau tu ti iya nya gempung parti dalam Barisan Nasional (BN) udah nerima mandat ti pemadu besai maya Pengawa Bepilih Nengeri ( PRN) ke- 11 ba taun 2016.
“Perintah ungkup rayat ti udah meri pemendar lalu deka bejalaika semaya enggau nadai bedalih,” ku iya nyemetak.
Julaihi madah, rentayan jalai pengangkut sereta penyambung nya ti nyadi pekara ke besai dikena perintah nengeri tu mai transformasyen di kandang menua pesisir enggau kandang menua ulu.
Berindik ari nya, sukung ti tegap ari rayat ngagai perintah nengeri endang beguna dikena ngemujurka pemansang ti udah dilangkar di kandang menua sida.
Sarawak ngembuan pengereja pengawa ti pakar sereta penatai pemisi dikena ngemansangka rentayan penyambung lalu program transformasyen ekonomi nyengkaum projek ngaga jematan Long Lama di Telang Usan Baram.
Ketuai politik dalam GPS enggau perintah nengeri endang masa sereta nemu peminta guna enggau juluk rayat.
Beserimbai enggau nya, perintah nengeri bebendar deka nyediaka wang turu ngemansang projek besai lalu enda bepanggai semua ngagai perintah besai.
“Kitai enggai bisi orang nyadi ‘remote control’ ari luar Sarawak ngatur nengeri kitai, penatai pemisi sereta pengeraja asal kitai,” ku iya nyemetak.