Peranak Long Bedian mantah Lah Anyi dichiri nyadi ketuai raban bansa

MIRI: Peranak genturung pendiau Long Bedian, di Apoh, Baram kemari mantah pengawa nyirika Lah Anyi @ Leslie nyadi ketuai raban bansa ti baru.

Seraban pengari peranak genturung pendiau Long Bedian, ti datai mantaika bantah nya ba aum pengarang beruta ba opis luyar, Roland Engan ditu, bedau lama, madahka pengawa nyiri Lah Anyi enda kala dipadah ngagai peranak dia.

“Kami enda nemu sereta enda kala nerima pengawa nyirika Lah Anyi laban iya enda diau ditu lalu jarang pulai ngagai Long Bedian, jauh pawi, iya ukai peturun ‘hipun uma’ tauka ‘maren uma’ iya nya peturun ‘ketuai’,” pia ku pengari peranak, Jeffery Jok, 65, nerang.

Jeffery ti mega siku ari kaban Komiti Pemansang enggau Pengelikun Genturung Pendiau (JKKK) nerang, peranak Long Bedian agi bepegai teguh ngagai adat lama sida ba pengawa nyiri ketuai raban bansa lalu pengawa tu diaku siti pengawa kudus lalu enda tau digaga sebarang, kelebih agi, nadai setuju ari peranak genturung pendiau.

“Ba adat istiadat nyiri ketuai bansa Kayan semina peturun ari bilik ti dikumbai ‘hipun uma’ tauka ‘maren uma’ ba genturung aja ulih ngetuai laban sida tu nampung pengawa nyaga tauka ngatur pengawa ba rumah panjai.”

“Kelimpah ari peturun ‘Maren’ tu, enda tau nyadi ketuai raban bansa,” ku iya nerang.

Iya madah kena 28 Julai tu tadi, peranak genturung pendiau Long Bedian baum, ti udah digulu lebih 200 iku, setujuka penemu nyiri siku ari peturun ‘maren’ tu iyaLennon Laing, anak ex-pemancha Laing Jok.

“Pemutus aum peranak genturung pendiau mega udah dianjung JKKK ngagai Opis Pelilih Long Lama, tuju iya nyiri ketuai raban bansa kami ti baru, nyilih penuduk Usung Wan,” ku Jeffery nerang.

“Taja pia, kena 15 Oktober tu tadi, kami tekenyit enggau siti penerang berita ti dikeluar ba surat berita menua tu, Utusan Borneo, ti madahka Lah Anyi nerima surat chiri nyadi Ketuai Raban Bansa (Long Bedian) ti baru ari Opis Residen Miri,” ku iya.

Berindik ari nya, sehari udah nya, peranak ngaga ripot polis ba Opis Polis Long Lama, mantah pengawa nyiri nya lalu bantah nya udah ditandu baru ba aum pengarang berita kemari.

“Nya alai, kami ngarika peranak Long Bedian minta Perintah Nengeri matak pulai pengawa nyirika Lah Anyi (enti amat) lalu minta chalun (Lennon Laing) ti udah disukung kami nama iya ngagai raban Opis Pelilih Long Lama, asil penemu ari aum peranak genturung pendiau,” ku iya nambah.

“Ari nya mega, kami sepenemu deka ngetanka atur pengawa nyiri ketuai raban bansa nitihka adat ti bisi ti ditulis enggau ditampung ari peturun. Ari nya, kami nulak sebarang pengawa nyiri ti bisi kaul politik, ti diasaika enda patut dikemeran ba pekara tu,” ku iya.

Raban nya datai jauh ari genturung pendiau Long Bedian, enam jam pejalai ngelawa Miri, bela disereta ex-pemanca, Laing Jok.