JBVM chakah bejalaika pengawa nagang pengerekai virus rabies di Mukah
MUKAH: Virus rabies tauka penyakit ukui gila diripot udah ngerekai di Dalat minggu siti tu tadi.
Igi penyakit nya udah berengkah ngerekai di nengeri tu kenyau ari Julai taun nyin kemari lalu udah bisi kes bebadi nyawa.
Berindik ari nya, igi penyakit tu endang dikemerat kelebih agi perintah nengeri lalu seruran ngengkahka pengelikun rayat ba tikas ke pamadu tinggi.
Beserimbai enggau nya mega, Opis Veterinari Bagi Menua Mukah (JBVM) udah ngaga siti renggat nuchuk vaksin ‘anti-rabies’ kena 20 enggau 21 oktober tu tadi ti bepalan ba Tebing Sungai Dalat.
Tu nyangka siti ari pekara ke patut tauka suah digaga ungkup sebarang kandang endur sebedau tu ke udah dikerekai igi penyakit nya.
Di Dalat enda semua kandang endur bisi datai jalai alun tauka jalai darat.
Agi bisi sekeda ari kandang endur ba sitak nya semina ulih diawa ngena perengka pengangkut ai.
Beratika sentang pemerat bekaul meri vaksin ngagai jelu inang, bisi ari sida ti beempu ukui sanggup ngena perau ari kandang endur tempat sida diau ketegal ti deka ngulihka vaksin ungkup ukui sida.
Hal tu udah diaku Ketuai Servis Vaterinari Bagi menua Mukah Hasnul Abdullah Buyung ti nyadi ketuai program meri vaksin tu.
“Sepengelama dua hari program, kitai udah meda mayuh peranak di kandang menua tu udah sanggup mai ukui inang sida ngena perau ari genturung pendiau semanjai Sungai Dalat,” ku iya madah ngagai Utusan Borneo.
Berindik ari nya, iya sereta mega staf ke bukai chukup puas ati ngagai servis ti udah diberi kelebih agi ungkup pengelikun peranak di sitak tu.
Kebendar nya, staf vaterinari ti bisi enggau program tu enda mayuh baka ti dijangka.
Semina empat iku aja staf ari opis nya ti bejalaika pengawa meri vaksin anti-rabies.
Semanjai dua hari program nya, sida udah mujur meri vaksin ngagai 120 iku ukui ti ngaul 72 iku orang ke nginang ukui nya.
Taja napi pengurang ari sukut penyampau tubuh staf ti bejalaika pengawa, tu ukai nyadi penanggul opis vaterinari nyaup komuniti sereta meri servis ti pamadu manah.
Nitih ku penerang, program meri vaksin tu udah berengkah diatur ba opis vaterinari kenyau ari 9 Oktober bedau lama.
“Kerejasama ti diberi sida ke nginang ukui nya kebendar udah meri pengering ngagai kami neruska program tu,” ku iya nambah.
Semua penanggul ku iya, ulih diputar nengah ulah sereta pementas sida ke nginang ukui.
Pia mega, ulih dipeda bala orang ti nginang ukui nya endang andal ati sepengudah nerima vaksin tu.
Ku iya, tu endang nemban laban pengawa nagang pengerekai igi penyakit rabies iya nya tanggungpengawa semua.
Sida besemaya deka terus meri servis ti pemadu manah lalu enda ngetu naka tu aja.
Program meri vaksin rabies deka terus dipejalai nyentuk kandang menua tu ditukuka nadai agi virus rabies.