Isu PKR Pampang Julau dilempai ngagai SPRM Tu bekaul enggau nyema bisi ulah makai suap ngaul chara PKR Pampang Julau nambahka kaban baru
KUCHING: Parti Keadilan Rakyat ( PKR) Sarawak ngelempaika ngagai Komiti Nagang Makai Suap Malaysia (SPRM) nyema bisi ulah makai suap ngaul chara PKR Pampang Julau nambahka kaban baru.
“Kami ngelempaika ngagai SPRM. Kami enda ulih ngaga dakwa sengapa kami semina ulih ngaga ripot ngagai SPRM lebih nemu nama patut digaga,” ku Mandal Chairman PKR Sarawak, See Chee How ngagai pemberita ditu, kemari.
Kelimpah nya, See mega madah PKR Sarawak nadai ngembuan kuasa dalam nentuka pengulih milih PKR Pampang Julau , seraya madah nya bepanggai ngagai iring ketuai parti enggau komiti ke udah dipilih ba renggat atas.
“Kebuah pia laban PKR endang sebuah parti reformis enggau progresif. Kami deka ngatur bepilih ngena e-voting, kami deka ngemanahka semua sistem ba baruh prinsip demokrasi, adil enggau tebuka.
“Nya alai, nyema bisi kaban baru mantaika pekara ti ngelanggar undang-undang enggau limpang ari atur pengawa parti, aku ngasai kitai patut beratika pekara tu lalu meresi rintai kaban nya.
“Kami ngarap parti nya ulih ngaga baka nya lalu engka ejensi baka SPRM enggau polis ulih nyaup kami,” ku iya.
Nangkan nya, PKR Sarawak memngkang bepegai ngagai dawa sentang chara PKR Cabang Julau nambah penyampau kaban endang ngalit ati, ti beratika penyampau kaban niki ngenyit.
Nya alai, ripot udah digaga ngagai Ketuai Pemadah PKR Sarawak, Vernon Kedit ba indu opis Komiti Nagang Makai Suap Malaysia (SPRM) Sarawak kemari seraya disempulang Sekeetari PKR Sarawak, Nicholas Bawin, See sereta bala ketuai pampang PKR Sarawak.
Ripot SPRM nya digaga pengudah palan servis Parlimen PKR Julau dibaruh Kaban Parlimen Julau, Larry Sng ngaga ripot polis sentang Vernon enggau nengah media ti mantaika dawa Vernon bekaul status kaban PKR Julau ti nyelai.
Larry nyereta PKR beberapa minggu udah iya menang penudk Parlimen Julau ba Pengawa Bepilih Besai Ke14 tu tadi ngena tikit ngati kediri.
Tambah mega, Nicholas madah pengawa nya ditangkan enggau penerang ari Sekretari besai PKR, Datuk Saifuddin Nasution Ismail iya nya semua rintai kaban udah diputus lalu sebana sida pasal pekara udah ngelebus ari timpuh patut mantah.
“Kami nadai pilih bukai semina ulih mai pekara tu ngagai SPRM laban pekara nya ngelanggar undang-undang lalu limpang ari atur ti dikedeka kami iya nya nengah parti nadai dikeibuh,” ku iya madah ngagai pemberita ba mua indu opis SPRM.
Berebak enggau nya, Vernon madah piak sida deka minta SPRM mansik silik bekaul enggau pekara nya.
“Kami deka SPRM nentuka sekalika bisi salah guna kuasa ari ketuai parti lalu bisi utai bukai dilalai ngelanggar undang-undang lalu limpang ari atur parti baka ke udah disebut dalam deklarasyen bekanun kami laban pendiau enggau penau parti kami diatu benung diperatika rayat,” ku iya.
Sebedau tu, PKR Sarawak udah mantaika sebana ngagai ketuai PKR bekaul penyelai kaban dalam PKR Pampang Julau ti niki ngenyit lebih 13,000 ari 603 kena Jun tu tadi dalam timpuh sehari beserimbai enggau pengawa bepilih renggat atas parti.
Kelimpah nambahka penyampau kaban, bisi dawa piak direjister nyadi kaban tang sida empu enda nemu diri.
Tu pengudah PKR Sarawak mantaika lebih 1,000 kaban baru parti nya tang sida madah diri enda kala setuju tauka minta diri deka nyereta PKR.
Tambah mega, lebih 1,000 kaban ke nadai ngembuan
See Chee How Mandal Chairman PKR Sarawak
lumur nyadi kaban parti, udah nya bisi lumur pansut lebih ari sekali ba rintai nyadi kaban parti.
Taja pia, Saifuddin diripot madah sebana bekaul penyampau kaban betambah ungkup kaban PKR nya ukai ba baruh bidang kuasa iya, tang pekara nya dilempai ngagai penyandang penduduk mandal residen parti, Dr Xavier Jayakumar.
Berebak enggau nya, Larry puntan digiga endur ngulihka timbal bekaul enggau ripot PKR Sarawak ngagai SPRM sentang Pampang Julau.