MA63 : Wan Junaidi dilalau nulis surat perambu ngagai perintah

KUALA LUMPUR: Kaban Parlimen Santubong Datuk Seri Dr Wan Junaidi Tuanku Jaafar dilalau nulis surat rasmi ngagai perintah nyema iya ngasaika penyampau komiti kaban Komiti Khas Kabinet ti meresa enggau berati Sempekat Malaysia (MA63) enda miak ngagai Sabah enggau Sarawak.

Sapit Menteri ba Opis Menteri Besai Hanipa Maidin madah perintah diatu sigi tebuka ngagai sebarang langgur penemu.

“Enti Yang Berhormat Santubong ngasai bala pengari rayat nya agi enda tetangkupka peminta Sabah enggau Sarawak, Yang Berhormat ulih nulis surat ngagai perintah ngaga langgur penemu.

“Kami nadai penanggul laban kami endang perintah ti seruran mendingka sebana rayat,” ku iya nyaut tanya tambah ari Wan Junaidi rambau Aum Dewan Rakyat kemari.

Wan Junaidi madahka Dewan iya nya representasi ari Sabah enggau Sarawak dalam komiti nya mimit lalu sebarang pemutus ke digaga ila nyangka ulih dikelikuh.

Ngelansa silik, Hanipa madah taja penyampau ari Sabah enggau Sarawak dipeda mimit, tang sida ke nyadi kaban komiti nya endang orang ke bisi kuasa ngaga pemutus bekaul enggau pekara dibantai.

“Engka penyampau enda mayuh, tang sida ulih ngaga pemutus. Bisi otoriti, dibaning nyema nganjung orang mayuh, tang nadai ulih ngaga pemutus. Nyadi kitai milih orang ke ulih ngaga pemutus, ulih meri pemutus nyemetak,” ku iya.

Kena 10 Okt tu tadi, perintah madah penumbuh komiti nya ti betuaika Menteri Besai Tun Dr Mahathir Mohamad lalu diarika 15 iku kaban bukai.

Entara nya Menteri ba Opis Menteri Besai Datuk Liew Vui Keong, Kepala Menteri Sabah Datuk Seri Mohd Shafie Apdal, Kepala Menteri Sarawak Datuk Patinggi Abang Johari Tun Openg, Menteri Wang Lim Guan Eng, Menteri Pekara Ekonomi Datuk Seri Mohamed Azmin Ali, enggau Menteri Komunikasyen sereta Multimedia Gobind Singh Deo.

Komiti nya dipelaba baum dalam timpuh sebulan ba Putrajaya dikena nentuka kuing tuju MA63. — Bernama