Opis Kaunsil Pelilih Marudi deka regas agi ngerembaika servis ngagai mensia mayuh
MARUDI: Opis Kaunsil Pelilih Marudi (MDC) deka ngerembaika bungkur servis sida ngambika komuniti mereti agi enggau teulihka pemaik ari Program Outreach dipejalaika raban kaunsil lalu tu siti ari strategi ngelawa renggat baruh enggau ngaul semak rayat, kelebih agi sida ti beguna amat bantu.
Program diatur begulai raban ejensi perintah nyadi pelasar ti betul dikena meri penerang besai agi pasal servis ti bisi disedia ungkup ngangkatka tikas idup rayat ba renggat baruh.
Ngena memanah pemansut ti disediaka perintah dikena mantu rayat ti dipejalai begulai antara ejensi perintah enggau komuniti deka meri pangka terus ngagai bala komuniti.
Pekara tu udah nyemetak dipansutka Chairman MDC, Kaunsilor Edward Mendai lebuh bejaku ba Program Komuniti Pelilih Telang Usan 2018 diatur MDC bepalan ba Balai Komuniti SJK Kee Tee, Long Lama kena pagi Hari Enam tu tadi.
Ku Mendai, antara program udah dipejalai baka program ‘Say No To Styrofoam’ ti ngemai rayat sedarka rampa menua ngelingi sida. Kelimpah ari nya, raban kaunsil mega ngatur 3Rs Created Competition enggau Rekacipta Poster Say No To Styrofoam renggat sekula ti ngemai pelajar renggat rumu ngagai bala nembiak sekula primari enggau sekondari berati enggau nyaga rampa ngelingi sida.
Nangkan nya, raban kaunsil mega bisi ngatur aktiviti pengerai baka Long Lama Jogathon enggau Pekit Nginti ungkup komuniti Long Lama sereta nyendiaka kaunter mayar chukai lisin, ti ngemuntangka pengawa sida ari pemisi servis ba Long Lama.
Program Komuniti Long Lama udah dipenyadi Kaban Kunsil Nengeri ( ADUN) Telang Usan, Dennis Ngau sereta digulu bala kaunsilor MDC, Pemesai Pelilih Telang Usan Baru Tai, Penghulu Desmond Yap Chieng Siang enggau Kapitan Yeo Kee Siang. MIRI: Penyinu ati bisi diasaika ba laman Balai Polis Pusat (CPS) Miri maya siku indai enda ulih ngetatka penusah ati beratika anak lelaki iya ditangkap polis pagi kemari.
Indai iya tu enda ulih ngetanka anak nya dibai polis laban nya endang udah atur.
Dua iku nembiak beumur belasan taun ditangkap ba sebuah rumah di Taman Tunku pagi kemari laban dipelaba bisi kaul enggau pengawa enchuri motosikal.
Nitih penerang, dua iku saspek ditangkap seraban opis ari Opis Pemansik Penyalah (JSJ) ari Indu Opis Polis Pelilih (IPD) Miri urung pukul 10 pagi.
“Maya pengawa nangkap nya, polis mujur ngerampas dua buah motosikal ke dipelaba motosikal churi kala diripot lenyau ngelama tu,” ku penerang nya.
Kededua saspek bela dibai ngagai CPS Miri begulai enggau barang ke dirampas ngambika dipansik.