Uggah nangi enggaika enti ulah nyual tanah nya dipajakka diak bansa asal ila nadai agi tanah di menua diri empu
BINTULU: Pansik sentang penyampau tanah adat hak bansa asal (NCR) ti udah dijual deka dipejalaikangambika nemu berapa penyampau tanah nya ke udah dijual pengempu asal tanah nya.
Sapit Kepala Menteri, Datuk Amar Douglas Uggah Embas madahka perintah udah meri beribu iti surat pala tanah ngagai pengempu tanah nya.
“Kami amat deka nemu berapa penyampau surat pala tanah nya ke agi dipegai pengempu asal tanah nya,” ku iya lebuh bejaku bejadi Simposium Adat Asal Iban Ke-7 ditu, kena malam Hari Empat tu tadi.
“Aki ini kitai udah bebendar ngulih lalu ngintu sereta nyaga tanah nya.Kitai rebak ke diatu enda tau enda nentuka nya dipajak sereta mengkang enggi engkitai,” ku iya.
Iya nangi enggaika enti ulah nyual tanah nya dipajakka, bansa asal deka nyadi nadai tanah agi di menua diri.
“Kitai meda pekara ke baka tu nyadi . Awakka kami mansik lalu aku deka berandauka pekara tu enggau Kepala Menteri Datuk Patinggi Abang Johari,” ku iya.
Sentang pekara tu, iya madahka bisi langgur penemu ti minta numbuh sebengkah organisasyen ngambika meli pulai tanah nya, ti nya chara ke penudi endar dikena ngulihka tanah nya pulai.
“Nyema tanah nya enda tau enda dijual, awakka organisasyen nya meli. Nengah chara tu tanah nya agi diempu bansa asal,” ku iya.
Ku iya baru, iya nemu tanah nya ba kandang endur ke mansang bisi diempu orang bukai, ambika chunto baka di Betong, Saratok enggau Spaoh.
Bekaul enggau pengawa nyukat kelingi, Uggah ke mega Menteri Betanam Betupi Moden, Tanah Adat enggau Pemansang Kandang Menua, minta perintah ngungkup belanja ke tuju nya.
“Sebedau tu perintah besai bisi meri belanja tang diatu kami enda nemu seka- lika bisi mayuh agi belanja diberi berindik ari ubah ke megai perintah besai,” ku iya.
Ku iya, proses nya bisi lubah laban perintah nengeri enggau Opis Tanah enggau Survei bisi penanggul ba pengereja pengawa.
“Perintah udah setuju enggau langgur penemu kami ngambika pengawa nyukat nya diberi ngagai penyukat ari kompeni peribit.
“Chara nya udah dipejalaika ba komuniti bansa Bidayuh communities di Serian enggau Bau ti udah dipejalai raban penyukat ari kompeni peribit enggau manah,” ku iya.
Taja pia, sebedau nunda chara nya ku Ugah, Prosedur Operasyen standard (SOP) patut digaga dulu lalu pekara nya deka dikerandau enggau Opis Tanah enggau Survei.
Ngenang pekara bukai, Ugah madah randau mega patut diatur begulai enggau opis Hakim Besai ngambi berundingka chara ngangkatka status Kort Bansa Asal awakka sama bekuasa baka kort tingggi ba pengawa mutarka kes tanah.
“Kort Bansa Asal kitai nadai kuasa ba pekara tu. Status iya b aruh ke alai Resident, D O enggau SAO nadai dilatih nitihka pematut bejakuka pekara tu.
“Diatu orang ke bisi duit ngena servis luyar ti nyata nadai meri pemaik ngagai pengatur pengawa ba perintah enggau ketuai komuniti,” ku iya.
Ku Uggah, Ketuai Hakim Malaysia Tan Sri Richard Malanjun bisi b etemu enggau iya lalu mantaika perambu dikena mutarka penanggul nya.
“Aku mega deka berandauka enggau Kepala Menteri kitai. Hakim Besai kitai deka nandu pekara nya enggau Putrajaya.
“Kami arapka kitai bisi hakim ke bepenau mendingka kes laban dudi ila kes ke baka nya tau dipending sereta diputarka ba Kort Bansa Asal kitai,” ku iya.
Kami amat deka nemu berapa penyampau surat pala tanah nya ke agi dipegai pengempu asal tanah nya. Datuk Amar Douglas Uggah Embas Sapit Kepala Menteri