Raban ATM dilalau anang ngaul diri ba pekara politik

KOTA SAMARAHAN: Sapit Menteri Ngetanka Menua Senator Liew Chin Tong dekaka Soldadu Malaysia(ATM) enda ngaul diri ba pekara politik.

Beambika chunto ba pengawa bepilih besai ke diatur ba bulan Mei tu tadi, iya madah ATM, polis enggau unit unifom bukai enda miakka sebarang parti lalu deka pekara nya dikemeran belama.

“Tu ketegal menua kitai meranka atur demonkrasi. Soldadu enggau polis enda miakka sebarang parti lalu semina angkunka raja enggau menua.

“Perintah baru Pakatan Harapan(PH) ngarap ATM ulih nampung semengat tu,’ku iya ba penemuai kereja ke Markas Pemerintah Medan Timur Sedadu Darat di Kem Muara Tuang ditu, kemari.

Penemuai Liew disambut Panglima Medan Timur Leftenan Jeneral Datuk Stephen Mundaw.

Ba program nya mega, Liew madah perintah diatu keran nusun atur ke tau ngangkatka ATM nyadi siti tim ke dipebasa rayat enggau dunya.

Ku iya, ATM nyengkaum MINDEF diatu diarika urung 130,000 iku orang lalu sida tu ukai semina ulih mantu ngenanka menua tang ulih mantaika idea baru.

“Tu mih tanggungpengawa baru kitai semua, idea baru ulih mantu kitai nentuka kuing menua,’ku Liew.

Sentang pengelantang raban sedadu enggau veteran, Liew madah pekara nya sigi seruran dipantau enggau silik.

Enti agih belanja enda chukup ku iya, kitai meseti ngiga chara bukai ke sama bela ulih nyaup raban tu

Ngenang kaul bukai, Stephen ba jaku pengelalu madah pengelikun kandang endur Medan Timur diatu dijamin sereta dijaga manah.

Tajapia, iya ngelalau tetiap iku sedadu Medan Timur ngambika seruran sedia napi sebarang pemar ke enda disadang.

Bela datai Panglima Satu Divisyen Mejar Jeneral Dato Toh Choon Siang enggau orang bukai.