Perintah dilalau beratka resolusyen ke diulih ari Simposium Adat Asal Iban Ke-7
BINTULU: Simposium Adat Asal Iban Ke-7 ti berambaika leka jaku ‘Optimising our resources: Leveraging on the digital economy for greater prosperity’udah diatur ba Promenade Hotel Bintulu.
Sapit Kepala Menteri, Datuk Amar Douglas Uggah Embas ti bejadi nya maya pengerami makai lemai kena Hari Empat tu tadi madah, raban pengari ke datai nya deka mansutka resolusyen.
Resolusyen ke diulih nengah simposium nya deka disuaka ngagai Kepala Menteri Datuk Patinggi Abang Johari Tun Openg ti dipelabaka deka nutup simposium nya kena 27 Oktober.
“Kami minta perintah, anang enda ibuhka nya lalu perintah patut berati sereta bejalaika atur ti patut ba sentang resolusyen kami,” ku iya.
Uggah pechaya Gabungan Parti Sarawak (GPS) ke ari baruh iring Abang Jo nya mending sereta deka nimbal pinta ke diguna ba renggat baruh komuniti.
“Iya siku orang ke manah sereta deka mending, kami begunaka timbal ari rayat. Tu mih maya, peluang, lalu tu mih ti dikedeka perintah, tu ila ulih mantu ngaga formula ke program kitai lalu dikena nentuka polisi perintah GPS di Sarawak, nyadi inklusif ti lalu beratika peneka semua bansa,” ku iya.
Ba simposium tu ku iya, semua raban etnik diberi peluang mantaika pekara ti nyadi dalam komuniti sida lalu berundingka chara ngempung nya nyadi budaya.
Ku iya,ungkup komuniti Iban simposium nya manah nyadika platform endur beratika semua pemujur ari semua sukut baka politik, ekonomi enggau pengawa rama.
“Nengah aum tu, kitai deka nemu baka ni kitai ulih netapka kuing semua komuniti jemah ila.
“raban bansa kitai patut ulih digempung magang, penyerakup kitai di Sarawak udah nyadika teladan ngagai orang bukai,” ku Uggah.
Berebak enggau nya, iya mega bisi ngenang sentang sekeda inisiatif perintah nengeri ba pengawa sida ke deka ngubah Sarawak nyadi menua mansang manggai ba taun 2030 sereta nyendiapengidup ke manah agi ngagai mensia mayuh.
Uggah ke mega Mentari Betanam Betupi Moden, Tanah Adat enggau Pemansang Kandang Menua mega bisi nerang silik sentang ubah ba sentang Undang - undang tanah, ti nyentuk ke diatu agi di kejaku sereta dipetalat ba media rama.
“Sida baka ke nadai pengawa bukai kelimpah ari mantah sereta bejai perintah nengeri sentang pekara nya.
“Kami deka ulih nerang laban kami deka nentuka, ngiga chara mutar penanggul nya nengah pengelurus sereta komited, mutarka pekara tu ke semua.Ukai deka bepinang benibung lalu ngambi tanah adat kita,” ku iya.
Niang Tok Nan ku iya, bisi ninggalka pesan ngagai iya enggau Abang Jo ngiga chara politik kelimpah ari nengah undang – undang dikena mutarka penanggul ke bekaul enggau isu pemakai menua enggau pulau galau.
“Ba penemu kami ubah nya mantu kitai ngetan, ngintu sereta nyaga tanah adat pemakai menua enggau pulau galau,” ku iya.
Sama bisi ngulu p engerami nya Menteri Utiliti Dato Sri Dr Stephen Rundi Utom, Menteri Muda Tanah Adat enggau Pesaka Datuk John Sikie Tayai, Menteri Muda Kaunsil Kandang Menua Datu Dr Penguang Manggil, Menteri Muda Pengelantang Pendiau Komuniti Datuk Francis Harden Hollis, chairman simposium Datuk Adexander Nanta Linggi, Penyanding Penemu Pansik Sains Datuk Patinggi Tan Sri Alfred Jabu Numpang, Residen Bintulu Jack Aman Luat, MP Hulu Rajang Datuk Wilson Ugak Kumbong enggau Kaban Kunsil Nengeri Samalaju Majang Renggi.