Perintah Sarawak deka terus ngelangkar program pemansang Rayat meseti meri sukung ngagai perintah, runding enda mudah dikeruga penemu luar ngambi ulih ngemujurka pekara tu
MIRI: Perintah Sarawak deka terus ngemanah program pemansang ungkup pengelantang rayat di nengeri tu ti dikembuan pupu bansa enggau ari mayuh penatai main asal.
Berindik ari nya, Menteri Pengintu Pengelantang, Komuniti, Indu, Ruang Bilik enggau Pemansang Nembiak Mit Dato Sri Fatimah Abdullah ngansak rayat di nengeri tu terus meri sukung ti tegap ngagai perintah nengeri.
“Anang nejuka runding kita dikeruga penemu ari orang luar. Endang nyata, perintah Sarawak nemu nama pekara ti manah ungkup rayat,” ku iya bejaku lebuh bejadika Pengerami Ngintu Hari Orang Indu renggat Pelilih Subis ba Balai Komuniti Bekenu kilah ensana.
Dikena nentuka pengelantang rayat terus dijaga, Fatimah madahka perintah nengeri ari baruh pegai Kepala Menteri Datuk Patinggi Abang johari Tun Openg udah ngelangkar bemacham polisi baru ungkup rayat Sarawak.
Polisi ti pemadu baru iya nya bekaul bantu ari sukut belanja ti deka diberi ngagai tetiap nembiak mit ke baru ada berengkah ari taun 2019.
Ku iya nambah, bantu be-
Anang nejuka runding kita dikeruga penemu ari orang luar. Endang nyata, perintah Sarawak nemu nama pekara ti manah ungkup rayat. Dato Sri Fatimah Abdullah Menteri Pengintu Pengelantang, Komuniti, Indu, Ruang Bilik enggau Pemansang Nembiak Mit
lanja tu semina ulih diambi sepengudah nembiak nya manggai umur 18 taun.
“Bantu belanja tu siti ari duit simpan ungkup pelajar nembiak Sarawak jemah ila. Kepala menteri deka madahka berapa penyampau bantu belanja tu lebuh iya bejuraika bajet nengeri 2019 ba aum kunsil nengeri bulan siti tu ila kena 5 November,” ku iya.
Beserimbai enggau nya, iya madahka peranak nengeri tu patut nyadika bantu belanja nya ke jalai nuju pemujur bala anak sida jemah ila.
Pengawa ti dekaka Sarawak nyulut dalam semua aspek pemansang enda ulih dijapai nyema nadai kerejasama ari semua rayat.
Ku iya nambah, bantu belanja bansa nya ulih nentuka tetiap raban nembiak rebak baru ulih nyapai pengandal sida nampung pelajar sekalika dalam bidang akademik tauka pengelandik laban Sarawak endang begunaka pengereja pengawa ti pakar dalam mayuh bidang.
Bekaul ngintu pengerami Hari Orang Indu, iya dekaka orang indu betatika tuju ngatur pengerami iya nya dikena meransang sida ngau diri dalam pengawa volunteer di renggat komuniti.
Pengawa volunteer tu, ku iya, ulih mega dalam pengeransing ngangkatka tikas pengerai orang indu ke mega nyungkak aspek pemeresi diri.
Mayuh macham aktiviti udah dilangkar dikena ngintu pengerami tu baka beperesa pengerai, pekit nyumai ‘Healthy MasterChef’, Mamacare, beperesa Pap Smear sereta bisi program randa bekaul penyakit riman sarang anak.
Sama bisi datai Menteri Muda Orang Indu, Ruang Bilik enggau Pemansang Nembiak Mit Rosey Yunus, Pemesai Pelilih Subis Jamalie Busri, Direktor Kaunsil Pemansang Mensia Mayuh enggau Ruang Bilik Menua (LPPKN) Denis Chai Cheng Ho sereta pemesai perubat Klinik Pengerai Bekenu Dr Shattish Sivarimuthu.