‘Sape Movement Festival’ keterubah diatur nerima sambut ke manah
MIRI: Lebih ari 1,000 iku orang ti rinduka Sape datai nedatka ‘Coco Cabana’ ditu apin lama ke udah dikena ngelakuka kereban muzik asal Orang Ulu nengah ‘Sape Movement Festival’ keterubah diatur.
Bala pesereta ti gagit enggau lantang ati lebuh ke datai ngagai endur ngatur pengerami, datai ari semua serak idup enggau mayuh bengkah menua, tang tebal agi datai ari Sarawak kelebih agi Miri.
Diatur Sape’ Movement enggau Ethnic Corridor, pengerami tu nyerungkai penatai asal Sape, baka ni nya ditempa sereta mega baka ni iya ngerembai.
“Tu keterubah iya kami ngatur Sape Movement Festival, asil ari inisiatif pemain Sape sereta nyendiaka pelasar ungkup rebak nembiak. Kami ngarapka nengah pengerami tu, kitai ulih mantaika main asal Sape enggau nempa mayuh agi pemain Sape.
“Kami deka nyidi orang ke landik sereta ngempung sida, sereta ngarapka ngambika pengelandik sida nya idup belama, sereta mega ngangkatka Miri dikelala agi nyadi mengeri ngembuan bemacham budaya laban kami kaya enggau bemacham budaya ti tau dipekunsi ngagai serata dunya,” ku Penengkebang Sape Movement, Hallan Hashim madah ngagai The Borneo Post lebuh dikerandau ba pengerami ti berengkah urung pukul 9 pagi.
Ku Hallan, pengerami udah nerima timbal ke chukup manah, enggau penyampau tubuh sida ti datai ngelui ari ti disadang, ari 500 ngagai lebih 1,000 iku. Tu meri peransang ngagai kami ngatur mayuh agi pengerami ke baka tu jemah.
“Kami ngarap mayuh agi orang deka ngelala main asal kami enggau Sape Movement nanam juluk deka mantaika pengelandik ke dikembuan kami ngagai serata dunya. Kami mega ngarapka pengerami tu deka dipasuk ngagai pengerami ninting taun dikena ngelaluka dagang temuai enggau matak mayuh agi temuai datai kelebih agi orang ti rinduka muzik, datai nemuai ngagai mengeri tu.
“Aku ngansak raban nembiak ti bisi pengerindu ba main Sape, datai ngagai kami laban kami deka bekereja enggau kita ngelakuka sereta mai budaya Sape pegari agi,” ku iya nambah.
Pengerami nya udah dipenyadi Kaban Kunsil Nengeri (ADUN) Telang Usan Dennis Ngau muakka lemai.
Ba jaku ti dipansutka iya, Dennis meri jaku puji enggau terima kasih ngagai bala pengatur pengerami ti udah bebendar ngambika budaya komuniti Orang Ulu dikelala, ditegi enggau ditan.
“Sape udah nyadi sebagi ari idup kitai, taja bisi ubah mimit ba muzik enggau tiun ari kereban muzik asal Orang Ulu, kitai mega deka meda penulin nya.
“Nyadi Mandal Presiden Gempung Serakup Orang Ulu Malaysia (Forum), aku temegah ati meda kita nembiak datai ngagai pengerami tu sereta Sape diatu udah angkat ngagai siti tikas. Seraya kitai nguji ngetanka penulin muzik Sape, kitai mega rindu meda nya tau dipegulai enggau muzik moden kemaya hari,” ku Dennis.
Iya mega madahka diri siru beratika mayuh rebak biak Orang Ulu kemaya hari tepekul ba ubah jeman ari komuniti moden, ke tau ngasuh sida enda ingatka penatai enggau pesaka diri.
“Aku ngarapka rebak nembiak deka seruran ngetanka main asal tu. Intu enggau manah main asal kita laban pekara ti ngasuh kitai nyadi mensia ti menyana kemaya hari ketegal aki, ini enggau apai indai kitai ti udah ngetanka pemanah main asal dalam pengidup kitai ny entuk ke sehari tu,” ku iya nambah.
Dennis mega ngarapka mayuh agi rebak nembiak, kelebih agi ari komuniti Orang Ulu deka nyukung pengerami tu dudi hari.
Antara aktiviti udah diatur nyerumba pengerami nya, baka Pekit Sape ti dibagi ngagai kategori asal enggau moden, pengawa mandangka Sape enggau Ikon Sape sereta pemansang Sape, Kelas Sape, mantaika chara ngaga Sape, Sape busking enggau nyabut tikit benasit.
Batang pengerami iya nya ‘Sunset Sape Fest Concert’ ti mantai raban orang ti ngaga enggau pemain Sape ti udah nempa kelai sida empu sereta dikelala ba renggat antarabansa.