MSTR merambu deka numbuhka sebuah Bilik Kelas Abad Ke-21 bepun taun baru, ku Ahmad
KUCHING: Perambu Opis Menteri Pelajar, Sains enggau Pansik Teknologi (MESTR) deka numbuhka sebuah Bilik Kelas Abad Ke-21 ba genap bagi menua ba nengeri tu bepun taun baru nerima timbal ke manah ari Serakup Pengajar Bumiputera Sarawak (KGBS).
Presiden iya, Ahmad Malie madah, serakup nyukung perambu tu ukai semina ga genap bagi menua tang mega ba genap sekula lebih agi sekula ke ngembuan perengka guna ke manah endang patut bejalaika kelas bepelasarka jeman baru diatu.
“Dikena ngemujurka model pemadu manah enggau penuh konsep budaya Belajar Abad Ke-21 (PAK21) ulih nyadi chunto enggau malin ngagai sekula-sekula bukai ba sesebuah bagi menua, engka nya ulih digaga piak MESTR Sarawak.
“Taja pia, berebak enggau nya kami ba KGBS ngelanggur ngasuh opis menteri bekaul ngaduka sekula ti nyadi chunto enggau perengka kelas PAK21 lebih agi ba sukut nyendiaka mija nembiak ti mayuh guna enggau tanggungpengawa sekula bekaul.
“Nya ulih dipejalaika nengah chara bemalinka mijamija nembiak ba sekula menua Finland kelimpah disikap enggau perengka guna bukai,” ku iya madah ngagai Utusan Borneo kemari.
Nengah chara nyendaika mija nembiak ti mayuh guna tu, ku Ahmad Malie, KGBS ngasaika sekula ti nyadi malin tauka model PAK21 nya tentu ulih nyadika chunto ngagai sekula bukai ba nengeri tu.
“Nengah pengawa numbuhka kelas bepelasarka PAK21 iya dikeandal ulih meransang pengawa ngajar enggau belajar nyadi lebih meruan,. Nya alai, kitai ngarap MESTR Sarawak dibaruh iring Dato Sri Michael Manyin Jawong ulih numbuhka kelaskelas bepelasarka PAK21 di sekula-sekula dipilih ba Sarawak sebedau iya nyadi nyata manggai taun 2019,” ku iya.
Tandu iya, nyema nengeri Sarawak nengah MESTR ulih numbuhka model kelas PAK21 tu, KGBS pechaya iya deka nyadika malin pemadu manah ngagai sekula bukai.
Apin lama ke udah, Manyin madah Sarawak merambu deka numbuhka siti bilik kelas abad ke-21 ba genap bagi menua di nengeri tu dipelaba berengkah taun baru.
Penumbuh bilik kelas nya ku iya, endang nyadi sebagi ari model ngagai sekula besemak nunda.
“Bilik kelas abad ke-21 tu ditumbuh lalu ba dalam nya bisi empat ngagai enam iku orang tauka kluster. Opis Menteri ngarap kitai ulih ngembuan abis nadai siti bilik kelas ba siti bagi menua awakka ulih digusung orang bukai lalu berati baka ni gaya bilik kelas nya sebedau sida iya nunda ila,” ku iya madah pengudah bejadika Aum Entarabansa pasal Transformasi Pelajar (i-CET2018) di Kuching kena Hari Tiga tu tadi.
Dikena ngemujurka model pemadu manah enggau penuh konsep budaya Belajar Abad Ke-21 (PAK21) ulih nyadi chunto enggau malin ngagai sekulasekula bukai ba sesebuah bagi menua, engka nya ulih digaga piak MESTR Sarawak. Ahmad Malie Presiden KGBS