Pengawa numbuh Kelab Doktor Muda ba sekula mayuh pemaik

SIBU: Penumbuh Kelab Doktor Muda di sekula-sekula primari enggau sekondari beguna amat dikena mantu sida belajar sereta bekunsi penemu chara nyaga pengerai enggau bala bakih, apai indai enggau mensia mayuh.

Pengari Pemesai Pelajar Pelilih Sibu Inggol Utek madah, Kelab Doktor Muda ngembuan juluk ngadaka raban nembiak ti ngemeratka pengerai sereta ngereja pengawa nyadi ejen ngelakuka pendiau pengerai ti dichunto.

“Aku pechaya program Zoomers mua ke pagi tu endang program ke chukup badas dikena ngelakuka Kelab Doktor Muda ba bagi menua Sibu tu.

“Nya alai, tuju program Zoomers tu endang manah dikena nambahka penyampau sekula ti numbuhka Kelab Doktor Muda kelimpah ngenegapka kerejasama pintar entara Opis Pengerai enggau Opis Pelajar Sarawak,” ku iya.

Inggol madah munyi nya rambua bejadika Zoomers Kelab Doktor Muda 2018 Renggat Bagi Menua Sibu di Sekula Sekondari (SMK) Tung Hua, ensana.

Sama bisi datai Pemesai Opis Pengerai Bagi Menua Sibu, Dr Teh Jo Hun enggau Prinsipal SMK Tung Hua, Goi Nguok Yew.

Kenu ku Inggol, program lutur biak berengkah kenyau taun 1989 iya nya ba Sekolah Primari ( SK) Seri Biram, Pahang lalu mega udah diberi status nyadi sebengkah ari aktiviti kokurikulum di sekula primari kenyau taun 2006.

“Udah nya ba sekula sekondari ti keterubah ba Sarawak iya nya SMK Agama Sheikh Haji Othman Abdul Wahab, Kuching ba taun 2013,”ku iya.

Inggol mega meri pengaga ati ngagai raban ari Opis Menteri Pengerai Malaysia enggau Opis Menteri Pelajar Malaysia bekau pengawa manah baka tu.

“Tabi puji ngagai pemujur kita numbuhka program lutur biak tu nyentuk iya nyadi aktiviti kokurikulum lalu diatu majak dikerinduka nembiak sekula primari enggau sekondari,” ku iya.

Ba penemu aku kediri, Inggol madah iya beratika program tu endang patut dipejalaika ba renggat sekula lebih agi dikena nerenak ulah bepengerai ba raban nembiak mit.

“Kitai endang nemu raban nembiak kemaya hari tu nyadi orang ke dikeandal ngiring menua jemah ila.

“Nya alai, pelajar tumu pasal pengerai ulih mantu piak sekula mutar penanggul pengerai ba raban bala nembiak,” ku iya.

Inggol madah, lutur biak ke dipadu datai ari nembiak primari 3, 4, 5 enggau 6 ungkup sekula primari lalu ba sekula sekondari datai ari genap kelas.

“Kami meri terima kasih ngagai Opis Menteri Pengerai laban udah nyendiaka modul ngajar, malin kokurikulum enggau perengka ngajar khas ngagai pengajar penyanding penemu enggau lutur biak.

“Semua nya dipeda mantu meri pengandal ati enggau pemerani ngagai sida ngereja pengawa ke udah diberi.

“Aku ngarap latih tu terus dipajakka Opis Menteri Pengerai ngagai bala pengajar penyanding penemu,” ku iya.