STAR enda lantang ati, PH Sarawak enda mantah jaku Lim

KUCHING: Parti Reformasi Sarawak (STAR) ngangkaika ulah kaban parlimen ari Pakatan Harapan (PH) Sarawak ti enda mantah tauka mejah penerang Menteri Wang Lim Guan Eng dalam Dewan Rakyat bekaul deka bekunsil asil enggau Sarawak nyema ekonomi menua udah manah.

Pekara nya dipansutka Presiden STAR Lina Soo nen- gah siti penerang ti ngasaika Lim nguji mantaika penerang apas madahka perintah besai begunaka awak nyentuk ekonomi enggau wang menua manah baru deka bekunsi asil enggau nengeri Sarawak.

“Kedalih nama dikena iya (Lim) nutup hak Sarawak ngambi sida terus ngambi tauka ngauk asil ari nengeri tu lebih agi minyak enggau gis kelimpah agih chukai,” ku iya.

Lina mega nyebut Kaban Parlimen PH Sarawak Chong Chien Jen, Baru Bian enggau Kelvin Yii puntan ngamatka semaya ke udah disebut sida maya Pengawa Bepilih Besai Ke-14 ke udah deka nambahka royalti Sarawak ngagai 20 peratus enggau mulaika 50 asil cukai nnegeri ngagai Sarawak.

“Sekalika sida semina besemaya bula sebedau PRU-14? Nama sida nyau lenyau jaku (semaya) diatu,” ku tanya iya.

Tambah mega, iya madah endang udah nyadi tanggungpengawa perintah besai nentuka Sarawak chukup belanja dikena ngatur pemansang pengudah ngambi asil chukai enggau minyak sereta gis ari nengeri tu.

“PH mega besemaya deka meri agih belanja ke lebih laban nadai agi ulah makai suap. Nama tu nadai nyadi?,” ku iya.

Berebak enggau nya, iya nangkan perintah besai dibaruh PH iya nya nadai atur udah ditulis dalam Sempekat Malaysia bekaul bekunsi asil bepanggai ngagai gaya ekonomi menua.

Kenu ku iya mega, ulah perintah besai nya diperati deka ngelabuhka ekonomi Sarawak lalu tu terus ngenadaika hak Sarawak ba Sempekat Malaysia.

Nya alai, iya ngarap rayat Sarawak bela besaup ngetanka hak nengeri tu ari terus dikeduan enggau diayah piak bekuasa.