Dikena nerenak penemu digital ba raban nembiak ke ulih nyikap sida napi ubah pemansang dunya digital kemaya hari
SIBU: Chairman Sibu Municipal Council ( SMC) Datuk Tiong Thai King minta raban pengajar nyikap diri enggau set pengelandik dalam industri ti relevan sereta nyediaka diri napi ekonomi digital ti dijangka deka mantu nambahka 18.2 peratus Pemansut Kasar Asil Dalam Menua (KDNK) ba taun 2020.
Ku iya, inovasyen digital diatu udah dikena dalam semua sektor lalu ngadaka peluang gawa ke baru. 90 peratus sektor pengawa jemah ila endang ngemeranka pengelandik ari sukut digital.
“Rayat Sarawak udah chukup untung laban bisi Kepala Menteri ti ngembuan runding ke panjai nengah pengingin iya ti bebendar deka ngemeranka ekonomi digital Sarawak sereta nyadika nengeri tu hub ICT ungkup menua tu.
“Strategi tu ukai semina deka nyungkak aktiviti ekonomi digital tang mega deka ngengkahka Sarawak ba mata dunya lalu mantu nengeri tu besemekih ba renggat global ngambi ulih nyapai pemansang timpuh panjai dalam e-dagang jemah ila,” ku iya nyemetak.
Tiong bejaku munyi tu lebuh bejadi ‘Hub mydigitalmaker’ Sekula Sekondari (SMK) Lanang pagi kemari.
Sekula nya udah nerima pemendar ari Malaysian Digital Economy Corporation (MDEC) ke nyadi semina sebuah sekula nya aja di Sarawak ke nyadi palan endur ngatur hub ‘mydigital’.
Entara sida ke bisi datai ba pengerami nya nyengkaum Ketuai Unit Ngatur Sekula Opis Pelajar Sibu John Francis Untam enggau prinsipal SMK Lanang Kho Say Wei.
Tiong ke mega Kaban Kunsil Nengeri ( ADUN) Dudong madahka mayuh ari raban nembiak kemaya hari udah ngemeranka digital teknologi dalam pengidup sida besehari hari.
“Mayuh sida nya endang penguna digital media. Kitai dekaka raban rebak baru tu seruran ransing, berani sereta nemu ngena pemisi tu ngambika sida ulih mantai lalu nyadi orang ti nengkebang teknologi, ngaga laman web, applikasyen, inovasyen sereta mayuh agi,” ku iya madah.
Tiong mega pechaya penunga ‘mydigitalmaker’ ulih ngubah raban nembiak di Malaysia ari orang ti ngena digital ngagai ketuai dalam ekonomi digital nengah pengawa ngemeranka pengelandik digital ke dalam kurikulum sekula formal lalu negapka agi nengah aktiviti bekaul enggau nengkebang digital.
Ari juluk ngenataika ino- vasyen, ku Tiong nambah, Malaysa endang begunaka mayuh agi orang ti ransing sereta penengkebang.
“Berindik ari 90 peratus pengawa jemah ila begunaka pengelandik digital, tu endang patut ba kitai dikena nentuka pengereja pengawa digital kitai jemah ila ulih nitihka arus pemansang ti disikap napi ubah digital tu.
“Nya alai, sama-sama kitai belajar lalu ngulihka penemu dalam ngangkatka pakar digital ungkup ekonomi digital kitai jemah ila,” ku iya nyemetak.
Dulu agi ari nya, Tiong udah meri pengaga ati iya ngagai sekula nya ke udah dipilih nyadi palan ‘mydigitakmaker’ ungkup Sarawak.
Ku iya, palan ‘mydigitakmaker’ tu iya nya bilik ngulihka mayuh penerang ti meri awak ba aktiviti nengkebang digital tauka latih ungkup pengajar, nembiak sekula sereta komuniti.
Nya mega palan ti nyambung pengajar, nembiak sekula enggau pemain industri.
Beserimbaienggaupengerami nya, Tiong udah madahka deka meri geran sepenyampau RM300,000 ngagai sekula nya dikena ngemanahka fasiliti ti udah lama.
Rayat Sarawak udah chukup untung laban bisi Kepala Menteri ti ngembuan runding ke panjai nengah pengingin iya ti bebendar deka ngemeranka ekonomi digital Sarawak sereta nyadika nengeri tu hub ICT ungkup menua tu. Datuk Tiong Thai King ADUN Dudong