Nengeri tu randaka pengereja pengawa ti ngembuan pengelandik

BINTULU: Nengeri tu beguna amat pekereja landik ti napi transformasyen pemansang jampat ba industri berat kelebih agi ba Taman Perindustrian Samalaju di baruh Koridor Kuasa Ulih Dikena Baru Sarawak (SCORE).

Menteri Bekal Ai enggau Elekterik Menua Pesisir ti mega Kaban Kunsil Nengeri (ADUN) Kemena Dato Sri Dr Stephen Rundi Utom madahka penyampat pemansang industri ba nengeri tu, kelebih agi ba Bintulu patut ngemegah, tang enda patut dipeda pia aja, laban kaul bala komuniti mega beguna amat.

“Nadai kaul nya, pemansang jampat industri deka nadai reti sereta enti sida tinggal enggau puntan, bala komuniti enda patut nyalahka orang bukai,” ku iya lebuh bejaku bejadika Karnival Kolej Vokasional (KV) Bintulu ba balai kolej nya kemari.

Nya alai ku iya, komuniti menua nya patut ngerebut awak enggau sedia belajar bemacham pengelandik ngambika ulih nangkup peminta orang gawa industri, kelebih agi nengeri tu enggai kelalu bepanggai ba orang gawa menua luar.

Iya ngingatka komuniti enda kelalu rindang enggau nejuka awak enggau pemisi industri ditu lepas pia aja, tang ngenang pemisi institusi kolej vokasional ti bisi nempa mayuh pekereja landik enggau jelan pengelandik dikena nangkup peminta nya.

Ku iya, lebih 900 iku nembiak kolej vokasional ti belajar bemacham pengelandik patut ngena pengelandik sida ngemansangka diri kelimpah bekunsika penemu enggau orang bukai laban modal mensia ti bepenau ungkup inovasyen enggau nyerungkai bidang baru patut ditempa sereta minta tambah ba penyampau graduet ba bidang teknikal enggau vokasional.

“Peragam negetif mensia mayuh nyengkaum apai indai pasal Program Latih Teknikal enggau Vokasional (TVET) bebida akademik patut dit- erang ngambika sida meretika agi,” ku iya nerang.

Dr Rundi madahka, Sarawak deka mansutka mayuh agi asil lalu siti ari chara iya nya nengah pengawa industri ti begunaka pengelandik, pemintar sereta latih ti meruan ba TVET.

“Lebuh Pehin Sri Abdul Taib Mahmud nyadi kepala menteri lalu diatu nyadi Tuai Pemesai Menua Sarawak, iya mega udah berundingka chara dikena nambahka pekereja landik ba nengeri tu ti bisi 2.7 juta peranakd dibida ngena orang gawa import,” ku iya.

Nya kebuah ku iya, nengah pelajar teknikal enggau vokasional ba kolej vokasional, kitai ulih nempa nembiak graduet Diploma Vokasional Malaysia (DVM) ti datai ari 70 peratus orang gawa, 20 peratus nembiak ti nampung pelajar enggau 10 peratus orang dagang tekno.

Lalu nembiak graduet Kolej Vokasional Bintulu ku iya, sida patut pintar ngerebut awak ngulihka kereja ti setipak enggau pengelandik sida.

Iya ngarapka pengawa ngelaku enggau ngemai kelala TVET nengah Hari Terbuka KV Bintulu ukai semina nyelinting sekula ba mengeri aja, tang mega ba kandang menua pesisir laban bidang pengelandik bisi penyulut dudi hari dikena nampung peminta makit pekereja landik dalam industri.

Berebak enggau nya, Dr Rundi ngemendarka agih belanja projek mit pemansang menua pesisir ( MRP) RM20,000 ari iya lalu Majang RM10,000 ungkup aktiviti Serakup Apai Indai enggau Pengajar (PIBG) Kolej Vokasional Bintulu.

Sama datai ADUN Samalaju Majang Renggi, Direktor KV Bintulu Jamali Muhamad, Ketuai Unit Pengatur Pengawa Sekula Opis Pelajar Pelilih (PPD) Bintulu Lau Siong Lee,bala temuai bukai, pengajar, ketuai raban bansa, bala nembiak enggau apai indai.